::: مـنتدى قبيلـة الـدواسـر الـرسمي :::

::: مـنتدى قبيلـة الـدواسـر الـرسمي ::: (http://alduwaser.org/vb/index.php)
-   :: قسم إبداعات شعراء المنتدى ومساجلاتهم :: (http://alduwaser.org/vb/forumdisplay.php?f=17)
-   -   ذعذعي يانود هبي ياهبايب مجاراة (http://alduwaser.org/vb/showthread.php?t=65450)

خالد المشاويه 04-04-2013 01:55 PM

ذعذعي يانود هبي ياهبايب مجاراة
 
السلام عليكم ورحمة الله وبركاته


اسعد الله مساكم بكل خير

بعد الانقطاع الذي طال لظروفه اطرح بين ايديكم

قصيدة للشاعر القدير / راشد بن محماس الزعبي ومجاراتي لها


لعلها تشفع لنا بعد الغياب

يقول راشد


ذعذعي يانود هبي ياهبايب = صدري من العام وهمومه تحوفه
كني اللي فاقدٍ شوف الحبايب = ومامضى بالعمر لايمكن نشوفه
هب ياذا الوقت دوراته نشايب = يبحث الخافي ويلحقني كلوفه
راس مالي وارثه من راس شايب = شايبٍ قولة نعم ماهي تطوفه
جعل قبرٍ ضم راسه للسحايب = كاسب الطولات نادرةٍ وصوفه
ماعشقت من الحياه الا الصعايب = ولارجيت من الردي مدة كفوفه
نتعب الاقدام ونحث الركايب = ولانلحقها على الدنيا حسوفه
كون علم الطيب لاجا وانت غايب = وكل رجالٍ خذا منه وصوفه

هذي قصيدة راشد سمعتها وهيضتني لانها تحاكي امور مريت بها شخصيا
وابوخالد شاعر قدير ويشرفني مجاراة ابياته

قلت :
ذعذعي يانود ! هبي ياهبايب = ( صدري من سنين والفرقا تلوفه ).
لابرا لي جرح غايب راح غايب = عقبهم ماعاد للدنيا طروفه
عشت بالدنيا وورتني الغرايب = والزمن لو طال دايرةٍ صروفه
اتصبر غصب والا البال طايب = والقدر قسّى علي دورة صدوفه
الاوله ! في مباركٍ(1) سد النوايب= انبرا حالي وانا نفسي عزوفه
وجات الاخرى راس مالي فالقرايب = عزوتي والا الردي جعله ذلوفه
ذاك اخوي ومحزمي عطب الضرايب = ذاك برجس(1) والمواقيف امعروفه
يوم كلٍ بالنعم قسمه نهايب = يدحم الميدان ويرّجح وقوفه
اصوكٍ متسلسلٍ من راس شايب= ولد عودٍ باللقا يشهر سيوفه
جعل يفدا حذاه ملعون الصلايب = خايبٍ ويشل غبنه وسط جوفه
شبه حرٍ ماتلفت للخرايب = للعلا والقاع لقاها كتوفه
سوقها قدام ياعطب الضرايب = وانت حرٍ والمواقيف امعروفه
ولاتضمد جرح غايب راح غايب = والصدر ديوان وهمومه ضيوفه
هاضني راشد وانا جروحي عطايب =و الا انا نفسي عن العالم عزوفه


( 1 ) - اخوي وولد عمي / مبارك بن مفرج بن برجس رحمه الله
( 2 ) - اخوي وولد عمي / برجس بن مترك بن برجس طالب هندسة بأمريكا وفقه الله

تحياتي ، خالد بن غازي بن برجس

ابومبخوت الدوسري 04-04-2013 02:37 PM

رد: ذعذعي يانود هبي ياهبايب مجاراة
 
صح لسانك يالجزل وتسلم يمناك ياذيبان

مجاراة طيبه جداً استمتع بقرائتها

وانت وافي جعلك تسلم والحمدلله على السلامه ..
ترانا فقدنا يالغالي وانت على البال

والله يرحم مبارك بن مفرج بن برجس ويغفر له ويسكنه فسيح جناته
وعظم الله اجرك يالغالي ...
والله يوفق برجس بن مترك بن برجس في دراسته ويرده بالسلامه



تقبل تحياتي يالجزل ,,

راشد المسعري 04-04-2013 05:50 PM

رد: ذعذعي يانود هبي ياهبايب مجاراة
 
صح لسانك ياخالد

قصيدتك جزلة والزعبي كذلك قصيدة جزلة ووافية

دمت مبدع يابو غازي ولك ودي وتقديري ،،،،

خالد المشاويه 05-04-2013 02:18 PM

رد: ذعذعي يانود هبي ياهبايب مجاراة
 
اقتباس:

المشاركة الأصلية كتبت بواسطة ابومبخوت الشكره (المشاركة 739739)
صح لسانك يالجزل وتسلم يمناك ياذيبان

مجاراة طيبه جداً استمتع بقرائتها

وانت وافي جعلك تسلم والحمدلله على السلامه ..
ترانا فقدنا يالغالي وانت على البال

والله يرحم مبارك بن مفرج بن برجس ويغفر له ويسكنه فسيح جناته
وعظم الله اجرك يالغالي ...
والله يوفق برجس بن مترك بن برجس في دراسته ويرده بالسلامه



تقبل تحياتي يالجزل ,,

صح بدنك ولاعليك زود نفداك
وجعلك ماتفقد غالي
والله لايهينك يابومبخوت

مشعل راشد الشايقي 06-04-2013 10:15 PM

رد: ذعذعي يانود هبي ياهبايب مجاراة
 
لاهنت ياجزل


لله درك اخي خالد على هذه المجاراة الرائعه


صح لسانك وعلا شانك


رحم الله ولد العم مبارك واسكنه فسيح جناته

ووفق الله ولد العم برجس ورده بالسلامه



تقبل حضوري المتواضع واعجابي


مع خالص التحية والتقدير

شافي بن راشد النتيفات 18-04-2013 02:23 AM

رد: ذعذعي يانود هبي ياهبايب مجاراة
 
صح الله لسانك وبيض الله وجهك على هذه الابيات الرائعه
زصح الله لسان زميلك


الساعة الآن 11:29 AM

Powered by vBulletin® Copyright ©2000 - 2024, Jelsoft Enterprises Ltd.
---