أعز من ضلعكم غرسي بالاوطاني=في موقع في قرار ما بني دونه
مدهال ربعي ومدهالٍ لخلاني=وربعي إذا جاهم الغربي يسلونه
عيد لاهل ضُمر لاجاو جيعاني=ومن ديرة الغُرب لامن جاو ينصونه
يقسم ثمرها على الجيران والعاني=ويظهر لا صكوا البيان من دونه
غرس حما لابتي ذربين ليماني=ومتعرضين بحدّ السيف من دونه
تغذى له الخيل وسلاح وصبياني=ومن جا يبي حدهم لاهم يردونه
والبل ورى حدّهم ترعى بحداني=لازان قفر الخلى لاهم يروسونه
من عفجة الخرج لامن حد نجراني=حد آل زايد بني عمي يعرفونه
ناسم عصا الجار يمشي بدون جيراني*=مهوب يوم اتقى زمله يهجونه
ودّايت الجار واسبابه بجدراني=ومن جدرهم جارهم راحوا يسوقونه
وخويهم في الخلى يرفع بلــلحاني=ما خاف من اللي بعيد لايبوقونه
هيبة خويّه وسلم عندهم باني=ما ياخذون الدراهم والدبش دونه
ونعشي الضيف ونغديه صفطاني=ثلاثة أيام للضيفان مضمونه
سلم لنا والقبايل غير حقراني=له وجبة عندهم سلم يمشونه
ولانبيع الماء واللحم بالاثماني=وعيب حضار النخل ياللي تحضرونه**