لي ذوق والعالم لها ذوق عن ذوق=وكل ٍ على ذوقه شفوق ٍ و تواق
و كل ٍ له بضاعه وشرايه و سوق=و ماش ٍ مشا لولا إختلافات الاذواق
و ذوقي جبرني العب اليوم طاروق=من مبتدا تبيين ما بي من اشواق
اسرد قصيده كنها ( قد ) ممشوق=من غيّها لفت لها وجيه و اعناق
اسج فكري واسرح شوي واسوق=بكرا فكر مع صيحة الوجد تنساق
وافضي كنين بيحه حب مخلوق=طفل ٍ قطف من جنة الحسن ما لاق
لا من ضحك ملكت انا ملك فاروق=و لا من تجهم عفت انا كل ترياق
أثمل على صوته وأغيّب ولا افوق=و صويحبي أثره مغيّب ولا فاق
فأنا أشهد إن ما كل منطوق منطوق=و ما كل عشاق ٍ مع الوقت تشتاق
ناس ٍ تسج ولا لها قلب محروق=و ناس ٍ من أعراض المحبه على ساق
فتدري وش أكذب فعل يا لين يا ذوق=ضحكي لعذالي وانا منك منعاق
و تدري وش اصدق فعل من ( نظرة الشوق )=دمعة غبن تنساب من عين مشتاق