قصيد لاحد الضباط برتبة لواء في مدينة الطائف واغلب اخوياه في العمل من قبيلة الدواسر
ويقال انه من اسرة المطوع بمحافظة القويعيه وقال ذالقصيده ينصح بخوة الدواسر

الياومرك الله وفي السوق طبيّـت=جنّب عـن المترديـة والنطيحـة
واليـاهـداك الله لخوه وخـاويـت=دوك الدواسـر كاسبيـن المديحـة
قوم(ن) اليا جات الحرايب طواغيـت=وكفوفهم تنـدى ولاهـي شحيحـة
فقيرهـم لاجيـت بيتـه تعشّيـت=تلقى الشحم والعود الأزرق وريحة
وكريمهم ترحيبتـه بـك الياجيـت=ترحيبة(ن) تبري القلـوب الجريحـة
إن قلت له تبقى قلط بك على البيـت=وإن قلت وشلونك ذبح لك ذبيحـة
وصبيّهم لاصحت فيـه وتعزويـت=صدره من النخوة يـروّع فحيحـة
قبيلة(ن) يفخربها الحـي والميـت=شريحة(ن) راحـت وباقـي شريحـة
من عاش يبقى طيّب الذكر والصيت=ومن مات منهم جعل ربي يبيحـة
ألاد زايـد هيضـونـي وغنّـيـت=ومن طيبهم هاضت علي القريحـة
حاولت أعد فعولهم لكـن أزريـت=وماقلت فيهم غير حاجة صحيحـة
فهمت من بعض التجارب وعانيت=ويكفيك من بعض التجارب نصيحة
الياهـداك الله لخـوّه وخـاويـت=دوك الدواسـر كاسبيـن المديحـة