ياهاجس الشعر وقف لاتعداني=لي فيك لآزم ولي رغبه ولي نيه
لاجيت أبو شايع المنعور حوراني=سلم على حضرته واللي حواليه
وقله ترى منذر بن رشود وصاني=عليك بالذات ياريف الجلاويه
يقول بلغه ماينطق به لساني=أبيوت شعر(ن) على وزن(ن) وقافيه
من صادق أحساسي وشوقي ووجداني=تزفها لابن شايع حي طاريه
من نسل قوم(ن) توطي كل قوماني=فريس حرب(ن) واهل وقفات وحميه
ربعي ملاذ الضعيف ومزبن الجاني=آلاد شكر(ن) نهار الهوش والهيه
عاداتنا لاقبس بالجو دخاني=يانصر محتوم ياموته جماعيه
يشهد لنا كل قوم وكل ميداني=مخضبة حد سيف وحد جنبيه
ياويل منا نديد(ن) له وعدواني=يصبح له بكيه ويمسي له بكيه
ولآمن ركبنا على ربدا وربداني=ماهمنا جمع خياله ورجليه
نبطش عدانا وكن الضد ماكاني=ولاراح من ضربنا لا ذي ولاذيه
يستاهل العز والناموس من داني=رجل(ن) بذل ماله ونومس عزاويه
فالمركز الأولي ماهوب فالثاني=اسمه طلع والقلوب السود مكويه
حسن على الفردي الاول وقد باني=عقبال مايآخذ الاول على الميه
هذا وشوف الجهام السود يشعاني=من شفت ذودك على بث الفضائيه
وانا مراهن عليك وكاسب رهاني=واللي يتحدى يدوس الجمره الحيه
اقولها وافتخر في سر واعلاني=ابلك من افضل حلال(ن) فالسعوديه