ألا مرحبا ترحيبةٍ تبدي سوات النور = تراحيبٍ سوات النور في جو السما العالي
عدد ماشالوا الشيله عدد ماجروا المجرور = عدد مابان في جو البسيطه شمس وهلالي
هلا مرحبا بالضيف والطرقي وراعِ الدّور = أقوله بالنيابه عن حزامي والله الوالي
أقوله عند ربعي عزوتي يوم الأمور عسور = جبالٍ في الجزيره في ذراها يامن الجالي
وفارسهم بوقت الحرب واحد عن مية طابور = يورّدها لو ان الجمع يزمي كنّه خيالي
مواقف شهيره يوم كلٍ له فعل مشهور = ليانٍ للرفيق وخصمهم يعطونه الصالي
وعليّه بالحرام إن الليالي ماعليها قصور = لكن اسم ربعي عزوتي في خافقي غالي
على الخرفه واهلها سلامٍ بالوفا مغمور = هل اليمنى الكريمه يوم سيف الجوع قتّالي
( وأنا غييثي من ارجال الدواسر مركزي معمور = على وجه البسيطه لو تميل الأرض ما مالي )
تدور دهور ولا عصور ولا سنين ولا شهور = قوي الباس ماينداس يبقى منزله عالي
تموت البوم فبيوت الخرابه والصقور صقور = عوايدنا الدواسر نزلنا فالعز ما زالي
وأنا شاعر ليا جيت المحافل مكسبي جمهور = ليا أرضيته يكفيني عن الدنيا والاموالي
وصلاة الله على الهادي عدد مابان ضوح النور = عدد ما بان ضوح النور في جو السما العالي

المشاركة الأصلية كتبت بواسطة فيصل بن جزاء (المشاركة 269061) ناصر لاهنت على نقل قصيدة الشاعر سلطان الغييثات وصح لسانه على قصيدته الجزله وسلمت يمناك على النقل تقديري واحترامي

المشاركة الأصلية كتبت بواسطة أبو عبد السلام (المشاركة 269066) لاهنت على نقل قصيدة الشاعر سلطان الغييثات وصح لسانه على قصيدته الجزله تقبل شكري وتقديري،،،،

المشاركة الأصلية كتبت بواسطة هايف العماني (المشاركة 269203) ناصر ال جزاء جعل يمناك مايجيك العطب ، وصح الله لسان قايلها ونعمً والله بآل نابت وباهل الخرفة جميع . تنصى هل الخرفة برد السلامي = نحبها ويزودنا اللي يزودها تقبل تحياتي،،

المشاركة الأصلية كتبت بواسطة ال شواي (المشاركة 269208) ناصر ال جزاء لكـ جزيل الشكر والتقدير على هالقصيده الرائعه . وصح لسان قايلها . ونعمً والله بالخرفه واهلها