قصيدة قحطاني في الوداعين
قصيدة الشاعر: سعد بن مهدي الحبابي القحطاني في مدح الوداعين أهل السليل عندما رافقهم اربع سنوات من خلال عمله كمعلم بمحافظة السليل

يالله يالمطلوب ياقاضـي الديـن= ياواحـد كـل المـلا تلتجـي لـه
فرد صمد مد البلد بالميامين= وامن وآمـان عقـب ماهـي محيلـة
يالله عساه ايدوم آميـن وآميـن= ياناصـر دينـك ومـن ينتميلـه
من بعدها والقول يلقا براهيـن= والعـز منهـاج القبايـل الاصيلـه
قول الحبابي بالحقايق ويازيـن= رسـم الكـلام اللـي يثبـت دليلـه
في مركب الايام والعمر يومين= حسب الضروف وللمعالـي وسيلـه
ومن طيب حضي جيت بين الوداعيـن= قبيلـة بالعـز نعـم القبيلـه
اهل السليل في المواقف سلاطين= عند القسى مثل السيوف الصقيلـه
روس الرجال مرجحين الموازين =اهل المراجـل والفعـول الجزيلـه
عاداتهم تعرف مع العسر والليـن= وقفاتهـم عنـد الشدايـد ثقيلـه
واهل الفعايل ملحقين المخلين =واهـل الجهـام اللـي قليـل مثيلـه
يرعون به حد المعادي جريين= من بطن نجد الـى النفـود المهيلـه
تشهد لهم طالاتهم في المياديـن= لاجـا نهـار فيـه قـدح الفتيلـه
وتشهد لهم عشر السوالف بتمكين= عند الخوي والجار لاقـل حيلـه
وسلومهم وعلومهم بالعناوين= في روس مشذوب الرجـوم الطويلـه
اربع سنين بينهم تعجب العيـن= والطيـب يثنـى كـل يـوم وليلـه
خوة شرف كني مع الربع لدنين= عزي لمـن دنيـاه ماتستـوي لـه
ماهيب تستغرب من اول وذالحين= مجنى حرار وكلهم مـن فصيلـه
وكل اخويانا بالفخر فالهم زين= ومـن قـدم النامـوس يلقـا بديلـه
واليوم جانا النقل مـن ويـن لا ويـن= الله يعلـم والليالـي كفيلـه
والله لولا الخط ماحن براضيـن= لاكـن كـلا ماضـي فـي سبيلـه
بين العمل والبيت ميه وعشرين= والوقت قاسـي والمسافـة طويلـه
ان جيت منا لا المناعير وافين= وان جيـت منـا حاجـة مستحيلـه
لاكن على ماقيل لو طول البين= القـدر يمـلا الصـدر والله وكيلـه
وعلى المعزة والمواصل مقيمين= سلم الرجال ومن دعانا نجـي لـه
الله يثبتنا على الحـق والديـن= ويزيـل عنـا كـل عيلـه وميلـه
وختامها ياشين فرقا المحبين= واللي شكاهـا ياعـرب عزتـي له