::: مـنتدى قبيلـة الـدواسـر الـرسمي ::: - مجارات الشاعر محمد الطنيني على قصيدتي ((قصيده مهداه لعشاق اللكزس))

حي الجواب الذي مثل العسل حالي = جا بوه من (مجرمه) توه بماعونه
راعيه نحّال ، ماهوأي نحّالي= واغلى من (الماس) عند اللي يعرفونه
ياحي (ابوبدر) حي اضداد الانذالي= اللي ليا نِشد عنه بساع يلقونه
ماهوب مجهول صيت ، ولا بمتعالي= إلاّ خوي الظفروالسعد ، ياعونه
في كل خصله (أمير) وعشقه هلالي= (زعيم) واهل الهقاوي ما يجارونه
قافه كما (الدّر) ما ينقص بمثقالي= سبك (الذهب) والمعاني حيل موزونه
جاني جوابه ومرسوله تعنّى لي = وادركت معناه ، واهدافه، ومضمونه
يشكي من الوجد وآنا آحسّبه خالي = من لاعج الحب ومقاساه وجنونه
اثره متيم وحاله يشبه لحالي = الله يعينه على بلواه ، وفتونه
العشق ياصاحبي همٍّ وغربالي = حملٍ ثقيلٍ ونصف العُمر عربونه
عزي لمن طب في واديه ،عزالي = سهران ليله وخلق الله ينامونه
الموت لاصارت الدعوى تعلاّلي = في شرع ناسٍ تسِن العهد وتخونه
إنشد مجرب دروبه دقّ وجلالي = ياما رقى النايف اللي صعب يرقونه
ياكم (تقهويت) عذب الشوق بدلالي = ضيفٍ معزز وخلاّنه يقهوونه
وياكم تجرعت انا مُرّه بفنجالي = في بعض الاحيان كنه عيب ومهونه
وإن جيت (ابدله)واقول الوحده احلى لي = مايسلم القلب من ناسٍ يعنّونه
الجادل اللي خذا في يوم (دسمالي) = تذكار .. واقفى يباهي به على متونه
اليوم ما يستمع حتى توسّالي = يلعب به الطيش ، والحساد يحدونه
وهومن اول يحايلني تحيّالي = ألفين عشّاق عني ما يسلّونه
هذي ظروف المحب بكل الاحوالي = نوبٍ فداوي ، وبعض اوقات يفدونه