أعز من ضلعكم غرسي بالاوطاني = في موقع في قرار ما بني دونه
مدهال ربعي و مدهالٍ لخلاني = وربعي إذا جاهم الغربي يسلونه
عيد لهل ضمر لا جاو جيعاني = ومن ديرة الغرب لامن جاو ينصونه
يقسم ثمرها على الجار والعاني = ويظهر لا صكوا البيان من دونه
غرس حما لابتي ذربين ليماني = ومتعرضين بحد السيف من دونه
تغذى له الخيل وسلاح وصبياني = ومن جا يبي حدهم لاهم يردونه
والبل ورى حدهم ترعى بحداني = لا زان قفر الخلى لاهم يروسونه
من عفجة الخرج لامن حد نجراني = حد آل زايد بني عمي يعرفونه
ناسم عصى الجار يمشي بدون جيراني(1) = مهوب يوم اتقى زمله يهجونه
ودايت الجار واسبابه بجدراني = ومن جدرهم جارهم راحوا يسوقونه
و خويهم في الخلى يرفع بللحاني = ما خاف من اللي بعيد لا يبوقونه
هيبة خويه وسلم عندهم باني = ما ياخذون الدراهم والدبش دونه
و نعشي الضيف ونغديه صفطاني = ثلاثة أيام(2) للضيفان مضمونه
سلم لنا والقبايل غير حقراني = له وجبة عندهم سلم يمشونه
ولا نبيع اللحم والماء بالاثماني = وعيب حضار النخل(3) ياللي تحضرونه