يا ربي يا رب السماء يا منشي ثقال الغمام=يا شافيٍ أيوب من ضره عقب ما هو سقيم
يا آمرٍ نارٍ تلظى كوني برداً وسلام=بك ألتجي واعوذ بك من كل شيطان رجيم
وبسم الله أبدى .. يا قصيدي طير اسراب الحمام=وغرد على غصن القوافي جرها صوتك رخيم
يا الفيصل البتار قدرك ما يحد ولا يسام=اقطف بساتين المعاني خلها بعدك صريم
وخلك تحت أمري .. هنا لا تبتعد شد الحزام=واليا انتهيت أوقف وقل لي واو نون وعين ميم
الناس تفرح بالقمر لمن وصل حد التمام=هو انت ما شفت السهر يزين من بعد العتيم
والطفل يسأل شايبه وشلون دقة هالنظام=وبدا الجواب وكل ذي علمٍ يجي فوقه عليم
وقال استمع هذا ترى من قدرة الحي السلام=يبدا هلال وبدر نصفه ثم عرجونٍ قديم
هذا حوارٌ دار واصله بين رجال وغلام=وشلون لو صار البدر بدرين في الليل البهيم
بدران هذا مبتدأ مرفوع ما فيها خصام=هذا كلام اهل النحو وافهم كلامي يا فهيم
ومن قال لا يمكن يجي بدران عندي لـه حسام=ارفعه في وجهه وقول افهم علامك يا غشيم
قبل حوالي تسعميه واربع وسبعين عام=استبشر الأزد بكريمٍ فارسٍ شيخٍ زعيم
وسموه بدران وتعلاَّ فوق مجد العز حام=يعني لنا بدران والاَّ غيرنا بدرٍ يتيم
بدران ياجدي عليك الفين رحمه يا قطام=جعلك تنعم واتلذذ وسط جنات النعيم
العز في دمك جرى يا شيخ في سن الفطام=وزودٍ على طيبك وجودك مالكٍ قلبٍ رحيم
والله لولا الشرك والله واعلم ان قولي حرام=لنصب تماثيلك عدد .. استغفر الله العظيم
ولي الفخر باسمك واحطه فوق صدري لي وسام=وهذا الوفاء في دمنا متوارثينه من قديم
حنا الدواسر آل زايد نفتخر ولنا مقام=حنا الدواسر ما نهاب الموت والصادر محيم
واذا اختلف في الجو شي وغيرنا جاله زكام=نشم دخان المدافع كيفنا شم النسيم
بياعة الأرواح نقبل ما نعرف الانهزام=كم فارسٍ حليلته ترملت وابنه يتيم
قاموسنا فيه استعدوا والتقدم للأمام=واضرب بعزمٍ لا تردد خل ضربك في الصميم
هذي حقيقة قلتها وانشد جميع أولاد سام=انشد جميع الناس تلقى لكل سينٍ ألف جيم
بين الدواسر والمراجل حب واصل للهيام=طيبٍ وعزة نفس ما يحقد ولا يمكن يظيم
لولا سجود الدوسري لله من خلف الإمام=إن تعجز ارضٍ ما تلامس جبهته شانه عظيم
أقول هذا جازمٍ به لا ولا أخشى ملام=عندي دليلٍ لا تعجل هذا برهاني خصيم
الأزد جداني وبين الأزد والطيب انسجام=ودليلي الأنصار واضح هذا ما يبغى تعليم
الأزد جداني جمل والأوس والخزرج سنام=ويكفي السنام من الجمل يعني جملنا ذا عديم
أسعد وسعد بن معاذ وحنظله وابن حرام=وباقي الصحب الكرام اللي مع الهادي الكريم
الله رضى عنهم وفضلهم على كل الأنام=يا ربي تجمعنا بهم يا رب زمزم والحطيم
وحنا فطاحيلٍ نسبنا للرجاجيل العظام=وسويلم الله يرحمه أسس لنا المجد القويم
نثبت في أوقات الشدايد حتى لو كانت جسام=والطفل فينا لا تعجب شيخ لـه رايٍ حكيم
إلنا الأمارة والزعامة والسيادة والزمام=جتنا وهي تمشي طرب جتنا وهي فينا تهيم
يا ثادق الله ما اعظمك وشلون ضميتي الكرام=لله درك وانتي حبك داخلٍ قلبي مقيم
يا ربي احفظها لنا يا حامي البيت الحرام=واسألك يا ربي تهدينا للصراط المستقيم
هذا وصلى الله على احمد عد من صلى وصام=وعداد ما زرعٍ نما وعداد ما هب النسيم