سلام ياللـي قـوم الحفـل واحيـاه=وللي حضر منـي سـلامٍ شفـاوي
سلامٍ أحلى من العسل فـي خلايـاه=واصفى من الماء في كفوف الرواوي
من شاعرٍ صاغ المثل صوغ واهداه=مثل الذهب والا من الطيب جـاوي
أول كلامـي بابتـدي باسـم الإلـه=يا الله ولا غيرك وانا بك رجـاوي
احفظ بلدنـا والملـك سـدد خطـاه=غيث القلوب اللي بالاصلاح نـاوي
يعطي ولا يطلب امقابـل عطايـاه=مسلم ومـن دون العقيـدة فـداوي
والله يعـز الحكـم واللـي تـولاه=اخـوان نـوره ممنيـن الجـلاوي
سـور البـلاد مجوديـن زوايــاه=مدفـع ودبابـه وكاشـف سمـاوي
ولا مـن يوميـاً تـدرب سرايـاه=والمنحرف ينس على القلـب لاوي
ولابد مايقضي علـى اخـر بقايـاه=طير العشـا لـو يتقـي بالمـلاوي
حب الوطن دايم على الراس واهناه=فوق الصـدور ونشربـه للتـداوي
وأصل الكلام يزين لا بـان معنـاه=والحفل شجع كـل شاعـر وراوي
يابرك هذا اليـوم بالـذات بركـاه=جمـع القبيلـه ماتجـي بالمنـاوي
العز يا بن قويد لـو غلـي مشـراه=تشريه يـا مـران باللـي يسـاوي
مران ابن متعب وحضـرة دنايـاه=العلـم ناصيكـم ولا نيـب غـاوي
ومن كان في زايد فنا اليوم بنخـاه=لاحد يجي في ماطرالـه قصـاوي
تـرى التفاهـم بينكـم والمسـاواه=عز لكم واشـروه باللـي يسـاوي
يا شيخ ياللي لك معزه ولـك جـاه=زيزوم قـومٍ ياصلـون الحـراوي
قوم تصـد المعتـدي مـن نوايـاه=الاد مسعـر مخلفـيـن الهـقـاوي
حربيهـم لا هازهـم يسحـن دواه=يوم الحرايـب والفتـن والبـلاوي
تامن صخاف الشول والقفر وترعاه=ومن دونها اللي مال ضربه مـداوي
خيالهـا فـوق الجـواد المضـراه=يهوى على الفريس مثـل النـداوي
مايسنـد الإ مـروي حـد شلـفـاه=مضرابهـا بالـراس والا الكـلاوي
وان اعتزى بصهيب وصلت حماياه=عاداتهـم دهـم الحلـل والبـراوي
درع إلى جـات المواجيـب يلقـاه=يدحم به جمـوع العـدا مايـراوي
ونعتز في زايـد ونفخـر بطريـاه=ولا لا التحام الصف رحنا عـواوي
يوم القبايـل بيـن سبـار وغـزاه=وتسمع صهيل الخيل ولا الحـداوي
وتغلب لهم تاريـخ والكـل يقـراه=تاريخهـم يقـرا مـع كـل راوي
هل سربةٍ لا جـا نهـار المثـاراه=تطرح عشا الجايع ويمسي هجـاوي
حنا الدواسر مرقـب العـز نرقـاه=يفرح بنا من جا من البعـد هـاوي
الجـار يهمـل والمدايـن معـفـاه=وفيهـا مـلاذ للمقـل الـخـلاوي
يوم القوي لا جا الضعيـف تعشـاه=ولا به انصاف ولا يبون التسـاوي
وكل على الثانـي يدرهـم مطايـاه=والموت عادي مثل شرب القهـاوي
هذا وانا مـن لاد حسـن المسمـاه=خيالـة الحرشـا نهـار العـزاوي
لطامة العايـل الـى عـال ممشـاه=عوق الخصيم اللي علينـا نحـاوي
نرعى جنوب الحد لا زاف مرعـاه=ونرعا بها الوسمي شمال الصداوي
واليـوم فـي الاسـلام والحمـد لله=ونلبس من ثياب المعـزه كسـاوي
وحفل لدواسـر عـاش منهوتبنـاه=وحط الجوايز من كبـار الهـداوي
يـوم المزايـن بينهـم والممـاراه=جاتك عطايـا الله تهـوم النـزاوي
سود تشابـه غايـة القلـب ومنـاه=فنس الخشـوم مبدويـات البـداوي
لاشافها راعي النظرضاعت اريـاه=تلقـاه مـن هـذي لهـذي يـراوي
سود تغالـط بالتواصيـف مسـواه=ماجابها من حينهـا حـظ شـاوي
يازينهـا تتبـع فحلهـا وتـبـراه=سند الغـوارب نابيـات القـراوي
ويازينهـا لابكـر الوسـم زيـنـاه=ترعى نبات ريـح عشبـه يـداوي
يازين شوف البل الى زاف ترعـاه=وباق عليها مـن شحمهـا شـلاوي
يا لله ياللـي تنـزل الغيـث يـا لله=نشكي عليك من الزمـان القسـاوي
الغيث يا با الجـود منـك نترجـاه=اسقـي البـلاد وكـل وادٍ سنـاوي
جعل السحاب اللي من الغرب منشاه=متلابس ٍ نوه مـن الغـرب ضـاوي
جعله على شبه الجزيره نثر ماهـا=يسقـي ديـار الباديـه والشـواوي
آميـن ياحـي سمـيـع طلبـنـاه=اقبـل دعانـا يامجيـب الدعـاوي