باسم الذي تسعى المخاليق لرضاه =يرجون عفوه يوم عرض الموازيين
من خشيته سجد نبيه وناجاه =وحنا على سنه نبيه مطيعين
ومن عقب ذكر الله تمسكت بعراه=أهدي سلامي للرجال الميامين
يامرحبا اعداد مزن نثر ماه =واعداد نوار زهت بالتلاوين
المزن عله تالي الوسم وأرواه =والطير من حوله يرف الجناحين
يامرحبا باللي هل العرف تنصاه =في مجلس شيد على الخير والدين
يستقبل أهل الدين والعلم والجاه = طلاقة إحجاجه لفعله عناوين
أحمد ابن بندر دروبه مخلاه =يتعب امجارينه بكل الميادين
يمناه تندى والصخا من مزاياه= أقول قول ثابت بالبراهين
ثلوثيته رمز الوفا والماراه =مدهال امعطرة المجالس لها سنين
إلى لفو يمه تهلهل محياه =كل يشوف القدر بين الحجاجين
ثلوثية تدوم من طيب مجناه =عشيرين عام وعام مع زود عامين
منارة للعلم تسر من جاه =والي لفاها مكسبه بين ثنتين
أما حديث يبهج النفس معناه =أو حكمة تنفع هل العرف وتعين
مرحوم ياعود على الجود وصاه =بندر الى عدو هل الحزم واللين
كل الصفات الطيبه من سجاياه=المعطي الله والنوادر قليلين
حاز الفخر كله من أقصاه لادناه =الجد بدراني وخال السلاطين
من أسرة يشهد لها بالملاقاه =يوم الجزيره مسرح للاكاوين
آل السديري في نهار المثاراه =على ظهور الخيل مثل الشياهين
كم طامع أعذر بسيفه وشلفاه =والى صمد أمسى عشا للسراحين
والفخر باللي ماتعدد مزاياه =عامر ابن بدران زبن الدخيلين
كم واحد وسمه من اعداه نجاه =من هيبته هابوه لوهم كثيرين
وسم العصا وسم الضمين أوورثناه =من عامر ابن زياد لليوم ولحين
آلاد زايد باسم زايد مسماه =خطلان الأيدي بالملاقا جريين
على مهار للحرايب مضراه=بمثولثات يفجعن المعادين
كم من حريب يابسات شفاياه=يبي القضا مير الدواسر معيين
واختامها ريح البختري نثرناه =بقدومكم عجت عطور الرياحين
وصلو عدد ماسبح العبد لله =على رسول خاتم للنبيين