معنا مجاهيم ومعنا مغاتير=ولا غبطنا الراجحي في رصيده
فلا قلت ياآل بريك ستر الغنادير=جمعن نوقف له وجمعن نبيده
في روسنا عند الملاقى صعاطير=واليا قدحنا ماتركنا شريده

مبداي باسم اللي له العبد طلاب = اللي جميع الخلق ترجى ثوابه
اللي رفع سبع بلا عمد واطناب = وسبع بسط وراسي عليهن هضابه
جل وعلا شان الولي رب الأرباب = سبحان من ما له حلى مشابه
ومن بعد ذكر الله ترى المدح لي طاب = في اللي زهاه ولبس غالى ثيابه
التغلبى اللي للامداح كساب = يستاهل الناموس راس شقابه
أبو مناحي شوق لباسة الكاب = ريمية تذبح صويب الصبابة
زامل إلى ذكروا هل الصيت ما غاب = نجمه سطع فوق النجوم وسمابه
جدي لمن عميت بصايره الأسباب = في البر والا في البحر يقتدي به
لاجيت بكتب فيه والحبر سكاب = جفت ينابيعه وهو ما وفى به
مواقفه مع القرايب و الاجناب = ومن جاه يلقى عنده اللي هقابه
حر لكفه فابرق الريش مضراب = شر شرير للعدى يندعى به
لهوى لكنه من الميازين مشهاب = ما ناش من روس الخشوم انتحى به
غضنفر ينهش بناب ومخلاب = متسيد مثل الأسد وسط غابه
سيف صقيل حده يقص الارقاب = تسمع له بصم الجماجم قصابه
عد رسين يارده كل شراب = هداج تيما اللي غزير شرابه
غيث لربعه بالجزيلات وهاب = ومن قل وجده في الزمان التوا به
كفه على ما قيل للسمن صباب = وما حاشته يمناه للضيف جابه
تلقى النشامى وسط ديوانه اسراب = ما رد دون الجار والضيف بابه
والكيف يعبأ للمسير وما طاب = ويستقبل اللافى بلطف ولبابه
كريم سبلا ما ذخر وحساب = كفه تنفد ما ملك من حسابه
يا عزوة المضهود فكاك الانشاب = يا مزبن اللي قرد حظه رمى به
يا راس عيصا يا ذرى كل من هاب = ياللي بك المكسور يجبر مصابه
المرجلة ما هيب سور بلا باب = من دونها تقصر شبور الزلابه
المرجله ضلع طويل ومرقاب = ولا من تمنى بالمناوى رقابه
ما ياصله يكون عكفان الاشناب = اللى لهم في مقدم الوقت جابه
شرواك يا عز العوانى والاقراب = يامحزم الضيق وذرى من لجي به
من لابة تأخذ على الخيل مهذاب = لاد الحبيبي في نهار الطلابه
يا سعد منهم في الملاقا له أحزاب = تأمن بهم لا ثار عج الحرابة
تلحق على صم الرمك شيب واشباب = لا صاح من حنشل بذوده عصابة
هذا وأنا من لابة ساس وانساب = عون الصديق وللمعادى ذهابه
قوم لها بالمجد عروة ومقضاب = وبين القبايل رمز عز ومهابة
لاد البريكى لاغشى الجو ضبضاب = تشبع على ثرهم جياع الذيابه
قلته وانا اللي للجزيلات جلاب = اصخر جزيل القاف وانقى عذابه
وبختامها يا مرحبا ألف ترحاب = بابن الكريم ومن حضر مع جنابه

ذا الليل ليل الخير والحمد لله = ليلة فرح ماله مقاييس و حدود
بحضور عدمين الرجال المسماة = اللي لهم في قمة المجد مجهود
يا مرحبا عدة رمل نجد وملاه = بربوعنا اللي في المراجل لهم زود
ترحيبةٍ تآزن جبل برك مهداه = لأهل العشر كسَابة الطيب والجود
لآد الحبيبي لا أنتحي العلم لأقصاه = زبن الغريم اللي من الضد مضهود
تغالبٍ لا جا نهار المثاراة = تآرد حياض الموت لا درهم الذود
خيَالة البل بالسيوف المحناة = تشبع سباع البر والطير والدود
فيهم موارى من مناحي وشرواه = ضراغمٍ فيهم سراحين وإيسود
واخص منهم طيب العرف والجاه = عدٍ مثل هداج يعرف ومارود
زامل عسى رخوم الرياجيل تفداه = شبلٍ نزيه العرض من كل منقود
به شارتين ثابت هنا تعداه = مواهبٍ جزلة ورثها من العود
عودٍ عسى الفردوس داره وملفاه = بجاه من تجرى بتدبيره النود
ضحكة حجاجه للمسير اليا جاه = وذاك السماط اللي على طول ممدود
مشبحه عوده مناحي بيمناه = يمنىً لأبو مناحي خطرها على الزود
تمت بذكر اللي من أول ذكرناه = ربٍ له عباده مطيعين وسجود