::: مـنتدى قبيلـة الـدواسـر الـرسمي ::: - دواســـــــر بالحرب يهدون الأعمـــار

- :: قسم إبداعات شعراء المنتدى ومساجلاتهم :: (http://alduwaser.org/vb/forumdisplay.php?f=17)

- - دواســـــــر بالحرب يهدون الأعمـــار (http://alduwaser.org/vb/showthread.php?t=50588)

دواســـــــر بالحرب يهدون الأعمـــار

سبحان من واعد هل الكفر بالنار = وأهل التقى بالمغفره والستيره
من شي المزون اللي بها ديم الامطار = نرجي عطا جوده ومده وخيره
مجري على وجه الوطا فيض الانهار = والعبد يعرف وش نهائة مصيره
نطلبه منجهاج السعاده والابرار = وقولاً على وضح النقا نستنيره
ونهجا على درب الصحابه والانصار = ولعل ماقلناه خير وخيره
ماينجرف فكري مع كل تيار = ياخذ مفيده ويتجاهل كثيره
ابافتخر بفعول ربعي هل الكار = قولٍ على برهان ماقلت غيره
هب النسيم وعانقه نفـح الازهـار=والفكر عانق فيـه نشـوة عبيـره
الشعر بحـرٍ يسبحـه كـل بيطـار=ولاكـل سبـاح يـعـدي غـزيـره
لاقالو الشعار فـي بـدع الاشعـار=اقطف ثمر مالاق واسخـر عسيـره
مالي عن الميقـاف صـده ومعـذار=في مدح طلقيـن الوجيـه السفيـره
اهل الفخروالمجد وافيـن الاشبـار=قوماً لهم في صفحـة العـز سيـره
دواسر بالحـرب يهـدون الاعمـار=لاولعت في الحـرب نـار السعيـره
اثقل على البيدا من جبـال سنجـار=خيالهـم يركـى الجمـوع الغفيـره
ايمانهم تـروي عطـش كـل بتـار=داوت عما عمي البصر والبصيـره
ويوم البيارق رفرفت والدخن ثار = والجمع يرسي والمنايا مغيره
وردو حياض الموت بعزوم وصرار= ماخاب من رب البرايا نصيره
وغشا العدامه رايب الدم وغبار =وصارت على الجمع المعادي كسيره
من دون زين الغرس حلوات الاثمار=شلف تقدم للمعادي بريره
ماسورت دون الطماميـع باسـوار=اسوارها حدب السيـوف الشطيـره
يصرم ثمرها لالفـا الـدار خطـار=وتشرب قـراح مايغثـرب حفيـره
الضيف يلقى عندنا بن وبهار = وحيل تقدم بالصحون الكبيره
ومن مثلنا يمن وياسم عصى الجـار=لاحدتـه سـود الليالـي نجـيـره
ندي وفاة الجار من طيحـه جـدار=سـلـمٍ تغنـوبـه رواة الجـزيـره
ونوفي حقوق الجار في السر وجهار=ونذبح ولدنا لجـل موتـه غريـره
ومن دون حلوات اللبن حسك الاوبار=نمـراً بمفتـوق القنـا والذخيـره
ياما حميناها على قب الامهار = بمصقل ترعب شباته جفيره
ترعى الطرف ماهالها روع الاخطار=حتى العـدو ماقـد شعاهـا نذيـره
يازينها لافرعـت عقـب مصفـار=وبطا من العد المسمى صديره
واقبل ولاد القاحها والبر طار =عن كل نابية الفقار الظهيره
شرقي جبال طويق ويمين ايسار = شرد الجوازي من طرفها تذيره
تلقى لها في كل دارٍ لها دار = تتبع حيا نوٍ جذبها بشيره
لا لاح برقٍ في دجا لليل سمار =وفي غب براقه شعاها غثيره
في شفها من دون تحديـد وحيـار=ترعى ثمر نبتـه وتطـرق غديـره
وصغيرنا ينشا على شبة النار = تبقى العظايم في عيونه صغيره
مهما كتبنا من تواريخ واخبار = يصبح قليل في زحول جزيره
في نجد سدنا كل الانحا والاقطار = وحفظ لنا التاريخ شمس منيره