بديت بسم اللي له الناس ترجيه= الواحد المعبود علام الاسرار
منجي نبيه يوم ينادي يناجيه=من بطن حوت وسط غبات الابحار
من بعد ذكره يبدع القاف واهديه=لبو محيا مكرم الضيف والجار
مبروك ختم حقق العز راعيه=ختم الشرف لاهل الشرف عز وكار
مركز شرف كل حضر يفتخر فيه= كل فرح به واصبح اليوم مستار
في وسط بيت كل من جاك ناصيه=يلقى الشحم واللبن وعلوم الاخيار
قصر مشيد ماتزعزع مبانيه=لآهل الكرم واضح كما ضلع سنجار
طيب يابو محيا تنومس مماشيه=لعل عمرك من طويلين الاعمار
يفداك نذل خايبات مجانيه=ساسه ردي وعند ربعه كما الفار
المدح في الطيب كما كنز نشريه=مدحه ينومسنا من اصغار واكبار
خل الحسود يموت غله ويفنيه=خله يولي جعل مأواه للنار
جدك عقيد القوم ياجهل فيه=له ضربت(ن) خلى العدوى منه يحتار
احزام ابو شبنان فعله يباريه=فعله عليه شهود في كل الأقطار
مضرب رمحه للعدو في ثناديه=من كف حر بالشجاعات مغوار
وشكت حصانه وانسدح جنب راعيه=ثم ارتكز في الارض شبرين مقدار
وفنجال ابن عبود متحدي(ن) فيه=شربه طليفيح وقدام الانظار
يوم جاك ابن عبود وبليس مغويه=ما يدري انه ساق روحه للأقدار
وكلآ بفعله يذكره ما يخفيه =وحنا هل العشر الذي فعلها صار
يوم السبيعي عند ذوده يراعيه=اقفو عليها في ضحا العيد واحتار
هذي فعايلنا ولاهيب تمويه=هرج صحيح واضح مابه اغبار
هذا كلام الصدق والكل يوحيه=وتشهد على قوله شيوخ لها كار
وهرج بليا فعل خسران راعيه=على الفاضي كما الجرف ينهار
وصلوا على اللي بالشفاعات نرجيه =لاجاء نهار فيه تشخيص الأبصار
نبينئ اللي طاهرات مواطيه=الشافع النافع الطاهر البار