السلام عليكم ورحمة الله وبركاته

اقدم لكم هذه المساجله بيني وبين الشاعر سلطان بن علي الشدادي الحارثي

وهي وحنا على ظهر السفينه في مهمه عسكريه في بحر العرب سألني ابو علي

(وش الحال يابوسالم) فكتبت هذه القصيده :

يابوعلي والحال مايفرح الحال=حالن كما حال الغصون المحيله
نرجي محالن دونه الحظ قد حال=ونرجي خراجن صار مافيه حيله
صرنا مثل حرن على الصيد محتال=حرن مبرقع والسبوق تحديله
او مثل زملن للثقيلات ماشال=هشن عظامه والمسافه طويله
اومثل شيخن للطويلات ماطال=خلوه ربعه مالقى له وسيله
او مثل ذيبن عقب عويه غدا ذال=عاف الطويل وعاف حتى عويله
لو انها ياصاحبي قصة اموال=نشري هوانا من هواة الرذيله
ولو انها ياصاحبي حرب عيال=علنا وكلن محتزمله قبيله
لكن يارجال للصعبه رجال=وحنا من اللي ينقلون الثقيله
نصبر على حالن تبدع بالاحوال=ولابد من يزرع يحصل حصيله

وهذا رد سلطان :

يامرحبا ياطيب الجد والخال=شيال حمل اللي عجز مايشيله
همك يابوسالم علي اشغل البال=ماجورمن كثرالهموم الثقيله
ان كان قصدك مال فانا لك المال=لابارك الله فاليدين البخيله
جتني بيوتن طعمها سكرن حال=بيوتن رجلن مايخلي زميله
حنابوقتن زايده فيه الاهوال=وقتن يصير اللاش شيخ القبيله
كثرت همومي والشقا بعثر الحال=ضاق الطريق ومالقيت الوسيله
انسى واهوجس لكن الهم مازال=اشد حيل الحظ ياقل حيله
وليانويت اسج والا انبسط قال=بالهون ياصاحب وراك الف ليله
يالله ياعالي على الخلق متعال=افرج همومن زايده كل ليله