مبروك يا زحل المواجيب براك=مبروك يالمنعور بشت الأماره
أنا أشهد أن البشت يا شيخ يزهاك=ياطيب السمعه يا ساس النعاره
بشتك ذرا للي من الضيق ينخاك=يومٍ بعض الناس بشته خساره
لا نافعٍ هذا ولا نافعٍ ذاك=جعله فداك اللي عديمٍ وقاره
شيختك ماهي شيخة فلوس وأملاك=شيختك فعل وطيب راس وسطاره
ورثتها من طيب ساسك ومجناك=جانيك عودٍ يا عسى الخلد داره
جانيك من ماكر حرارٍ ورباك=على المراجل لين سرت بمساره
وحشت المراجل كلها بفعل يمناك=يمنى تمد ولا تعد الخساره
تعيش يارجلٍ حميده سجاياك=ياللي فعول المرجله لك تجاره
فتحت بابك والرياجيل تنصاك=في مجلسٍ وسطه تشب المناره
مجلس وفا والطيب نهجك ومبداك=مجلس كرم فعل المراجل شعاره
الضيف تذبح له من الحيل لا جاك=وقبل الشحم بنٍ كثيرٍ بهاره
الطيب طبعك والوفا من مزاياك=يا كاسب الطالات في كل غاره
لانك من اللي تارد حياض الادراك=لاد المنيعي للمعادي دماره
يشهد لنا التاريخ في كل الأفلاك=وسلومنا ماغيرتها الحضاره
وختامها يالله عسا الرب ياقاك=ياللي محلك دايمٍ في الصداراه