يازين شيفان المغاتير سراح =لاجاك عساس بعلم وكيدي
وآخذ على بعض المجاهيم مشواح =لاطولوا عقب القعاد الشديدي
وأبرى لها من فوق زينات الأشباح =من وارد (....) توه جديدي
نرعى بها بنت الوسامي الياطاح =لوكان من دونه ديار بعيدي
لانيب لاشاوي ولانيب فلاح =نرقا المكان اللي نباته جديدي
يازينها لامن سرت عقب مرواح =علط الرقاب اللي سوات الجريدي

يالله طلبتك من حقوق المخاييل=وإنك تعجل بالحيا ذا الزماني
يسقى الياجتنا حلول المحاويل =والعشب يدفعه الحمل وترباني
وحنا نسجه بالبكار المشاميل =جرد الرقاب مشرحفات الآذاني
كبار الوروك محجلات الأسافيل =شيب الفطير اللي كمعها متاني
مر مجانيب ومر مشاميل =وهذه طرات الروح والعمر فاني

لامن نزلنا خايع عله السيل =حول الركا والاجنوبي ذقاني
ولا أصبحت أنا شبيت ضو المعاميل =وشبيتها قدام ولد الهداني
حتى اليا شبت يجون الرجاجيل =من قام منهم من محله نصاني
يبغون كيف مقند بالفناجيل =في مجلس فيه الهروج السماني
ما نيب خطوى واحد كنه الفيل =غوج ولا يفهم جميل المعاني

ترى خوة الطيب لزوم تسليني =وترى خوة الرديان ما نيب باغيها
أنا أدخل على الله من مخاوي الردييني =ضعاف العزوم اللي قلال حسانيها

ترى شوف زينات الغنادير يحييني =صغار (...) اللي دقاق مثانيها
عليها الشعر الأشقر سوات الرياحيني =كسالبة كمن القمر ظاهر فيها

أحب الهنوف اللي على غاية الزيني =دقيق المعنق والردي ما يهاويها
لاجاد ولدها نادر يعجب العيني =يشوق النظاير والمراجل يحاظيها

وضحان صلح طبخة تبعد العوماس =لزوم أجر الصوت حتى تبهرها
أبا أجر الصوت يبعد الهم والهوجاس =وزا في ضميري عبرة ودي أظهرها
أنا بعت ذودي با تصرف سوات الناس =وادور المصالح يوم كل يدورها
ترى هواي الطيب والعز والنوماس =واحب التعرف بالنشاما وقاصرها
وأحب الدلال الصفر والنجر والمحماس =وضو تقندل ما يقزيك ساعرها
وأحب البكار الوضح حب بغير قياس =وأحب الفحل لامن وسم في عشايرها
وأحب الشديد لعرفه زارها العساس =مع لابة ما هي تحسب خسايرها