لاد الحبـيـبـي تشـتـهـر بالـفـعـايـ=لاثقل على العدوان من طويق وقراه
عدونـا يمـسـي بــه الحـيـف مـايـل=وان جـا نهـار الكـون مـاحـن بـنـدراه
من صلب أهل عشر كسبنا النفايـل=ذود المعادي في ضحا العيد زعنـاه

سلام من صدرن فتح مزلاجه=يضرم على بدع الشعر مزاجه
من هاجسن له فالمواقف وقفة = ماهيضه سدة لزوم وحاجه
يدلي بدلوه لا توانو غيره = ولا حضّرت كبر الضنون يواجه
وانا ليا حان اللزوم اشرّف = العرف بيتي والشموخ سراجه
سلام ياصرحن يرود الشيمة = عصره طويلن والزمن ماعاجه
في عيلمه كل الدواسر تفخر = العز سوره والبخت بابراجه
تردع اجفونه كل راعي عيلة = وتغني ركونه كل صاحب حاجه
سرحن باسم لاد الحبيبي يزهو = وسمن على راس الزمن ماماجه
عزوة هل العشر الشهيرة وايضا =جدن ورثنا العز من منهاجه
صرح المصارير الأكابر يكفي = القول بأنه ما ينال سياجه
دام الفخر والطيب ساسه الاول= أكيد تيجان الفخر بادراجه

يامرحبا ترحيبة كنها الهيل = هيل الحبش ومخالطه زعفرانا
يامرحبا وإعداد ما يدرج السيل = بضيوفنا وربوعنا واصدقانا
ترحيبة تملا صدور الرجاجيل = مجيكم فخر ويسعد مسانا
جيتو وفاء ومقدرين مشاكيل = ربعي هل العادات هيف السمانا
اقولها من هاجس يوفي الكيل = مشاعر من شاعر ما توانا
وليا حضرنا مع زحول حلاحيل = نثبت مواقفنا ونكرم لحانا
وليا ولينا شاردات التماثيل = نرقابها حتى تجي مستوانا
والشعر له معنى وحكمه وتاويل = عند العقول النيرة له مكانا
والشعر ديوان العرب ماضي الجيل= ينبيك بالواقع عيانا بيانا
ويشرح لك الحاضر ويعطيك تفصيل = وعند الوقايع موقفه ترجمانا
الله يكفينا البلا والغرابيل = والله على الدرب السليم يهدانا
ياهل الوفاء ياكاسبين التنافيل = ياهل العقول الواعيات الذهانا
تنبهوا للمقبلات المقابيل = وتمعنوا باللي يحوف قصرانا
من حولنا كل الفتن مظلم الليل = والله يرفع مابهم ويحمانا
والنعمة اللي نتملكها بلا كيل = ترى عليها ماملكنا ضمانا
وراس القطار إن فات ما ينفع الذيل = وش عاد منها باقي في يدانا
من لا يعصب الراس ويسرّج الخيل = تصير عشره بالشدايد ثمانا
شوموا من التنقيص والقال والقيل = وصيروا على كسب الفضيلة خوانا
كف الضراعة ينرفع تالي الليل = ناجو كريم ما يغره خفانا
تواصلوا بالدين واصحوا من الميل = وإليا نسينا الدين ربي نسانا
صيروا يدن وحده تضد الأباطيل = اللي تحاول طعنة في قفانا
الحاقدين المفسدين المغاليل = لو يملكونه ما يذعذع هوانا
الله عليهم يرسله طير ابابيل = ويشفي صدور المومنين الحزانا
ويحفظ بلدنا من شرور الزلازيل = وملوكنا اللي من ذراهم ذرانا
والله يخذّل من يبي منّهم نيل = ومخالفتهم فسق والله نهانا
كل الصعايب صخروها بتذليل = وحنا رضيناهم ونالوا رضانا
وإنّا بهم مانستمع للدهاويل = وعلى كتاب الله نجدد ولانا

يالله ياعالم مسير الأهله = يامدبر ذالكون دقه وجلّه
ياواحدن ماغيرك احد يوحّد = انت الحكيم ووالي الامر كله
عني على تقديم جزل المثايل = اللي لها التاريخ يفت سجله
اللي إلى عديتها من سمعها = ياقف لها عز وتاقف رضاّله
ومن بعد ذي ياكاسبين المدايح = تستاهلون الفوز وانتم هلاً له
الفوز ماياتي حدن بالسهاله = ولا جابه اللي جالسن في محله
ما جابه الا من يروم المعالي = الل إلى زوّد له الحمل شلّه
الفوز فوزك يابن فصلا وفوزي = وفوز القبيله بينن بالأدله
قبيلة تاريخها من قرابة = قدم لها فنجال صينن و دلّه
تاريخها في ماضي الوقت يعرف = الزير سيفه بالحرايب يسله
وتاريخها في حاضر الوقت حاضر = ظلن يظلل من خذا الوقت ظله
ياما خذت من المجد ذروة سنامه = والمجد مايصعب على من وصلّه
الطيب وهبه من جزيل الوهايب = ولا كل من يبغى طريقه يدله
أحدن يدوّر له ولا ينكتب له = وأحدن وضعه الله بقلبه جبلّه
أقولها وأثني لكل القبايل = اللي مواقفهم كبارن إمطلّه
وختامها ياكاسبين المدايح= تستاهلون الفوز وانتم هلاً له

بإسم خطلان اليماني مزبنة الدخيل = لابتن تكسر شبات العدا وتذلها
ربعنا للي لا تبرا عميلن من عميل = في يدينا مثل حدب السيوف نسلها
مرحبا ترحيبة عن هدفها ما تميل = ما تساق إلا على واحدن قدن لها
عند ربع تكرم الضيف لا شح البخيل = الكرم والطيب والمرجله طبع لها
شط مفرودن يقلط وخرفانن وحيل = وسفرتن ممدودة تتعب اللي فلها
والدلال الصفر يعبا بها بنن وهيل = ذي يقدمها المقهوي وذيك يزلها
بعد هذا طالبك يامجيب المستسيل = ياكريم معضلات الأمور تحلها
مدني من زبدة الهرج والقول الدليل = صوغة من سمع ترديدها ماملها
تعجب الناقد ويبرابها جرحن عليل = يوم بعض القول بعض الكبود يعلها
شاعرن في بحر الإبداع لي باع طويل = اتخير بين دق الامور وجلها
ويوم كل جا بمده ومكياله يكيل = ذا يصوّت للقبيلة وذا ضدن لها
وابتدا فتح المظاريف وإظهار المحاصيل = وجات من حظ الدواسر وهم كفون لها
قلت ياهل العرف ما للجزال الا الجزيل = وافتخرت بفوز ربعي وجيت إرضاً لها
وفوز فيصل وافي الشبر كساب الجميل = يعتبر فوزن يعم القبيلة كلها
يابن فصلا يا اصوك الراس يالسيف الصقيل = سلّها لا هنت يابومحمد سلّها
أشهد إنك يابن فصلا صنعت المستحيل = الاوله لاخوك والثانية محتلها

سر ياقلم واكتب لي القيفاني = اكتب وانا باوزن لك الأوزاني
أول كلامي دايماً ذكر الله = الواحد اللي ماله احدن ثاني
الواحد اللي مستوي في عرشه = اللي رفع سبع بلا عمداني
سبحان من يسمع دبيب النملة = وعلى محمد نزّل القرآني
فضله علي وانا احمده في فضله = لأنه على الدين القويم احياني
سر ياقلم واكتب قصيدة شاعر = معطره بالمسك والريحاني
اغوص باعماق البحور العسرة = واجيب منها اللول والمرجاني
من شان لا مرّت على اذن السامع= يقول لي بالحال: صح لساني
الليلة الليلة ياطيب الليلة = اللي جمعت ربع وصديق وعاني
اللي لهم موقف وطيب وفزعه = الله يبيض وجههم من داني
عز الله إنهم محزمك يافيصل = وانته سندهم لا احتما الميداني
لولا ثقتهم فيك يابو محمد = ماكان جوك اللابه الشجعاني
لانك تريد الخرج باعلى قمة = وتسعى لها في نهضة العمراني
من غير قاصر فالذي قد فازوا= الكل منهم في لزومه باني
خلو يديكم يانشاما وحده = وخلوا بلدكم افضل البلداني
ترى الامانه حمل وانتم قده = الله محملها على الإنساني
والله يعزك يالمليك الغالي= وولي عهده سيدي سلطاني
حكامنا نفخربهم ونماري = خلوا وطنا افضل الاوطاني
يادار وانتي رايتك مرفوعه = غصب على الراضي مع الزعلاني
يادار والله مايمس ترابك = حنا نحارب زمرة الشيطاني
يامرحبا ترحيبة عن خالي = وعن ربعي اللي تكرم الضيفاني
ربعي وانا ربعي جبال شمّخ = تاريخهم يعرف من الازماني
خيالة الشرفا وانا الحبيبي = فزعاتهم يروابها الضمياني
قدام ما اختم ياجماعه قافي = لا بد اوضح الاسم والعنواني
تدرون منهو ياعرب شاعركم = الشاعر اللي يبدع القيفاني
انا ولد عودن ينومس ربعه = يشهد له الشايب مع الشباني
يشهد عليّه يوم جوه ضيوفه = واطلق ولدهم طلقة الغلطاني
ثم صوّب الاول وصاب الثاني = واصبح ابوهم موقف بلشاني
ثم ارتكا للحمل رجلن شاله = وخلا ولده بدل ولدهم جاني
انا ولد ظافر وجدي مغثي = الله يرحم شايب رباني
عساك في الجنات ياخو مشعاء = انته وابوك وجدّك الرقعاني
تمت وصلى الله على افضل خلقه = محمد اللي من نسل عدناني