::: مـنتدى قبيلـة الـدواسـر الـرسمي ::: - يالله أنك لاتعود العسكريه / وسع الملعب لقاف الشمريه!!

- :: قسم الـشعر العــام :: (http://alduwaser.org/vb/forumdisplay.php?f=16)

يالله أنك لاتعود العسكريه / وسع الملعب لقاف الشمريه!!

http://x20x.com/upfiles/5SW81913.png

يالله أنـك لاتـعـود العسكـريـه
النصيب اللي على البدلـه حدانـي
لبسونـي لبسـة ٍ ماهيـب لـيـه
درعونـي باللبـوس المشبهـانـي
دربونـا مثـل تدريـب المطـيـه
والصعب منـا يعـود مطوعانـي
يالله انــك لاتحملـنـا زريــه
حيـث حنـا للمعاصـي ماندانـي
ياوجودي وجـد حمـر ٍ عيدهيـه
ساقط ٍ فيها الحقب ويـا البطانـي
فوقهـا قـرم ٍ ببـا كـور ٍ قويـه
من ورى العارض يبي دار شهراني
قطـر القربـه وقدمـه قيهمـيـه
مع زوال الظهر يوم الشوف دانـي
هسها العرقـوب والديـره رديـه
لين دم الجوف بالذرعـان حانـي
او وجودي وجد عرب ٍ فوق طيـه
في لهيب القيظ معطيـت ٍ ثمانـي
هملـن عيالهـن بـارض ٍ خليـه
واصبحـن اعيالهـنـه ذيهبـانـي
يوم جـن البيـر لياهـي جاهليـه
مـا عليهـا لا ورود ولا محانـي
بركن بالشمس تصهرهـن شويـه
كل منهن كنها الخـرص الهلالـي
لو بغيت ادله طرى الطاري عليـه
واستحس القلب والهاجوس جانـي
يوم اشوف الدين مرتجـدا ً عليـه
والظهر عريان والجـوع يحدانـي
طالبك رزق ٍ تحطه فـي يـد يـه
ماعلى بابـه شريـف ولا هدانـي

الشاعر / عواض بن ضيف الله الشلوي
.
.
.
هذه ريوف الشمري
ترد على صاحب القصيدة
التي أنتشرت عبر أثير الجوالات
.
.
.
وسِّـع الملعـب لـقـاف الشمـريـه
وسّعـه للحـق أنـا بطْلِـق عنانـي
خلنـي لا تْحِـط قيـدك فـي يـديَّـه
ولَّعَـتْ ألفـاظ شعـري و المعـانـي
جمـرةٍ كتمانهـا صـعـبٍ علـيّـه
كـل شاعـر لا كِتـم شعـره يعانـي
يشتِعل مـن شـان يسْتهـدي بضيّـه
كلّ طرقي فـي دروب الليـل عانـي
هزّني شاعـر سمعتَـه فـي عَشيّـه
عسكـريٍ يشتكـي مـرّ الـزمـانِ
قـال ربـي لا تعـود العسكـريـه
و الزمان اللي على البدلـه حدانـي
قلت أكيـد الرجـل واقـع فـي بِليّـه
أو مصيبـه صكِّتـه بيـن المحـانـي
قـال وشـو درّبونـي كالمطـيّـه
و اتِضح مقصود شعـره لـي وِ بـانِ
طار قلبـي و أثـري الدعـوى كِذَيَّـه
ما أقـول إلا يـا دانـه دانـي دانـي
استلمها جَتْـك نِصـح اخـتٍ لِخيَّـه
ولا أبي مـن وقتـك إلا لـي ثوانـي
قُمْ وِ صلـي و اردع النفـس الشِقيّـه
و احمد اللي يرتجيـه إنـسٍ و جـانِ
الله اللـي مـدّ لـك رزق و عطـيّـه
حـرِّك بحمـده يدينـك و اللـسـانِ
كان شغل (العسكري) متعـب شِويَّـه
قبلك اللي من التعـب عـضّ البنـانِ
الرجـال اللـي يخوضـون المنـيّـه
كـلّ صعـبٍ يَحْمِلُـون إلا الـهـوانِ
إسأل الصحـرا وِ صمـت المهمهيّـه
عـن فعايلهـم وِخِـذْ منهـا البـيـانِ
كيف شقّوا بالصخـر مجـرى وِ مَيّـه
كيـف عاشـوا مِـعْ ذيابتهـا بأمـانِ
صادقوا فـي مشْيُهـم شمسـه وِ فَيّـه
وِ عْقِدوا مَعْ بـرّده و قيظـه رهـانِ
كلّ من لـه نفـس صبَّـاره و حَيَّـه
بـإذن ربـي يقطـف ورود الأمانـي
لا تِشَكّـى ... أشهـد إن العسكريـه
غِصن رزقٍ وارفٍ رطْـبٍ وِ دانـي
كَمِّ بيـتٍ مـن وراهـا شـبِّ ضيِّـه
يغْرِفـون اللحـم دايـم بالصـوانـي
و كـم راسـب بالفصـول المدرسيّـه
ما لقى فـي غيرهـا رزق و مكـانِ
جندي و راتِبْـه خمـسُ وكـم ميّـه
نعمـةٍ مـا يجحـده غيـر الجـبـانِ
أضربـوا للعسكـري أحـلا تحيّـه
لَوْ هُ جندي أشهـد إنـه راعِ شـانِ
حَيِّ (عَينه) لا غَفـتْ عيـن البريّـه
أسْهَرَه لجل الوطـن حـبّ و تفانـي
اللي لا صِحْنا رمى روحـه هديّـه
يوم غيره مـن غـلا روحـه أنانـي
لا تلومـونـي بـحـب العسكـريـه
لـو أغنـي دَهْـر حُبـه مـا كِفانـي
خيرهـا طَـوّق بَعَـد ربـي يِـديّـه
رزق أبوي وْ شِغل أخوي بهالزمانِ
و أنـا بنـتٍ لا جحـود ولا غبـيـه
و احمد اللي بالرضـا دايـم كسانـي
في ردودي دوم لي بالنصـح نِيّـه
لا طلب شهره ولا هـو شـي ثانـي
عِنْـد هـذا البيـت وَقَّفـتْ المطـيّـه
وِ أكتمل ردي عسى المقصـود بانـي