::: مـنتدى قبيلـة الـدواسـر الـرسمي ::: - الشكره والعجمان وبن حفيظ والدامر

هذي قصة معروفه وكلكم تعرفونها ذا المعركه بين الشكره الدواسر والعجمان واعطيكم القصه بالتفصيل
جا ابن خرصان الشامري عند الشكره وبالتحديد محمد بن فرج ال حفيظ امير الشكره
وولده سند المهم
جا بن خرصان الشامري عند الشكره وصار جارهم وقال محمد بن حفيظ يا دواسر ترا ابن خرصان اعده اخوي وما على الشكره عليه وقده واحد منا المهم لقا كل علم غانم بن خرصان من الشكره وذبايح له وقصرتن طيبه ويذبحون له الشكره ولقا الكرامه
ويوم جا ذاك اليوم ويجي الدامر ( بعيد المغزا ) عند الشامري وقال يا بن خرصان انا بغزي الشكره ومعه العجمان قال بن خرصان منت بقادر على الشكره ( كل الشكره مجتمعين عند بن حفيظ لانه ناوي بالمغزا مجمعهم ) كلهم مجتمعين وبن حفيظ موجود قال الا بغزيهم قال والله ان جيتهم ان يتغير وجهك قال الدامر انا ما جيت الا ابي الكسب قال بن خرصـان
هجل بعلمك اترك الشكره ورح لـ ابل المساعره لانهم مهب موجودين وهي تفلي ولا المساعره عندها لانهم نازلين صوب الوادي قال تم المهم ويقوم الدامر ( بعيد المغزا )
وياخذ ابل المساعره بارده لان محد حولها من المساعره ويوم خذاها ويعود الدامر ومعه ابل المساعره
صوب بن خرصان هنا قام بن خرصان يرزف ويعرض ويرمي لانه كسب ابل الدواسر
ولا احد من الدواسر يدريبها اليوم الثاني جا ابو عوينه وقيل مره شملت ناقتها وعرضتها من يم الشكره يعني انكم غزيتو المهم جات العلوم لبن حفيظ قال ما هقيتها يابن خرصان تغدر فينا وهو يكلم نفسه المهم وهو يعتزي ويصيح ابن حفيظ لاد شكر عيال ابوي وهم ويجتمعون عنده
يحسبونه يعطي الامر بالمغزا قال يا ربعي ذلحين اخذت ابل المساعره ولابه الا انتو واني رادها رادها لو انا لحالي قالو الشكره والله ان عور في وجيهنا ابل بنا عمنا توخذ ولا فيه الا حنا وانا معك قال كفو وين محل الدامر فيه قال سند بن حفيظ هنا قده حول الغيثاني قال هجل اسمعو بنحد الدامر وربعه على شعاب طلحا ومخضار ولاني مخلي احد منهم ولا خلصت بعود على بن خرصان المهم ويوم تواجهو في شعاب طلحا بين الشكره والعجمان يقودهم محمد بن حفيظ وولده سند
والعجمان يقودهم الدامر ( بعيد المغزا ) وحدوهم على شعاب طلحا وتسيل شعاب طلحا من دمان العجمان وصارت ذبحه كلن يعدها واكسرو العجمان كلهم وبعظهم انسحب في وسط المعركه واللي بقا من العجمان اذبحوه الشكره واللي ذبح من الشكره بلا واحد ولا بقا احد من العجمان الا الدامر بنفسه ما بقا منهم احد قال بن حفيظ يا لاد شكر كسبتو الطايله وسعد منهو منكم يا عيال ابوي وان كلن بيعد فعلكم مير اتركو لي الدامر ولحد يلحقني ويلحقه محمد ابن حفيظ ويضربه بشلفاه وقعت في رجله المهم قده كسير
ويزبن الدامر عند بيت اختلفو منهو زابن عنده لكن الاكيد انهم نساوين من الحراجين ينقالهم ال ملحم وقيل لا انهم ال لاحم المهم قالت عجوز ابن حفيظ مهب مخليه تكلم النساوين لكن اسمعوني لا قرب بن حفيظ هدن عليه عمد البيت وطيحوهن على الدامر ترا بن حفيظ بيتركه ويوم جا بن حفيظ طيحن عليه العمد وعقبها اتركه بن حفيظ وهمله عقب طيحت البيت عليه
وعود محمد ابن حفيظ لبن خرصان قال يا الشامري لو انك ماخوذتن ابلك اول من يرجعها حنا يا دواسر وانت تدل الدامر على ابل المساعره وين الاخوه والكرامه اللي جاتك منا لكن ذلحين ما جرا على الدامر والله ان يجيك مير الخلا لاتغيب شمسك عندنا عد اني ذابحك وتراني ما هديتك الا ذل من المنقود ان احد يقول الشكره ذبحو قصيرهم
عاد هنا قصد ابن حفيظ اكثر من اربع قصايد وقصدة لدخيل الله بن محمد بن دخيل الله الشكره فيها
وهذا بيت لبن حفيظ في الدامر

وقال شاعر أخر من الشكره قصيدة منها :

ياهيه يالصبيان اللي تدوفون الملاح = حذرته الأول وكبوا كدار احثالها
ما بعد خبر المداري تلذذ واستراح = كون من هو للحرايب يشب اشعالها
خلي (الدامر) عليه العمد والبيت طاح = و(شعب طلحا) من الزنايج عذت نزّالها
في نحانا يشبع الطير خفاق الجناح = وتشبع العرجا ويبقى عشا ً لعيالها

( يعني الجنايز = زنايج ) من كثر الجنايز فيها من(( العجمان ))يوم سالت شعاب طلحا من دمهم
وذا الابيات لبن عزرم الشكره الدوسري:

((والدامر ))يوم جاب جمعـه وقـداه=يضرب على غراتها في المضامي
مع ((شعب طلحا )) يمشي السيل بدماه=وعاف الطمع يوم شاف الدوامـي

وبعد ذا البيتين لشكري

ومحمدابـن حفيـظ ياكـبـر صيـتـه=وسنـد المسمـى قـادهـا ويقـودهـا
سندابـن محمـد ضربتـه معـروفـه=عقـر ثـلاث مكـرمـات بجـودهـا
رجع صخاف الشول في(( شعب طلحا))=وحرم على ((العجمـان ))تكسـب فودهـا

هذي ابيات من عرض قصيده طويله
لشاعر الكبير شايع بن برجس الشكره الله يرحمه ويسكنه الجنه
وذي الابيات اللي وصلتني

هيضني الدامر مقدي جردة = يزفى (صخاف الشول) من مصدارها
ثم التقوهم لابتي في (طلحا) = ربع تعفي مدنها وأمدارها
يوم التقوهم لابتي ما سندّوا = واللي يعز القوم فعل اكبارها
منهم (ثلاثين) ومنا (واحد) = وان الله اللي ممضي ٍ اقدارها
ثم سال (مخضارٍ) بسيل أدميهم = من وقع ربعي مرخصة عمارها

ابيات اخري من قصيده
طويله

ولا يجحد التاريـخ مـن يذكـره=وعاده يذكر مخضـار ولا نسـاه
لابتن اعتزت في يـوم الشجاعـه=وردت سخاف الشول ما تبي جزاه
ولا عقيد القوم طـق فـي خـلاه=يلحقه بن حفيظ مع بندق وشلفـاه
لين زبن بن ملحـم ويـا كبرهـا=البيـت والعمـد عليـه هديـنـاه
ولاد شكـر ارخصـت ارواحهـا=عزوت شكر تطرب من اعتـزاه

وهذا قصيدة شاعر الشكره المعروف دخيل الله ابن محمد ابن دخيل الله الشكره الدوسري رحمه الله ، وقد خلد المعركه في قصيدته .

قال الذي فرسـان ربعـه شجعـوه=وعبر بماكنه ضميره مـن جـواب
والمدح لو بارواحهم يشرى شـروه=ترخص بغالي الروح فيها والرقاب
ماضني العجمان مخضـار نسـوه=يوما شعبه سـال سيـل بلاسحـاب
الادزايــد بالثمـيـدي سيـلـوه=من دم يام سال سيل بـلا سحـاب
نوه عجـاج الخيـل للـي خيلـوه=والسيف برقه واشهب الملح الرباب
بيوما به الدامرعلى طلحـا رمـوه=زادو دماره وجعلوا عـزه خـراب
جاغازيا يبغي الطماعـه وطمعـوه=والجيش اخذت والخسايرفي الرقاب
غره عـدد جنـده وقومـه وهقـوه=وخذه الغرور وراد ربي له ذهـاب
درس لهم طـول الليالـي مانسـوه=ومامربالشيبـان درسـا للشـبـاب
تسلم يدين اللي ورى حقـه جـزوه=وماخلوا المجرم يـروح بلاعقـاب
هـذا اسيـرا عندهـم واستيسـروه=وهذاعطيب الكون من زرق الحراب
في جرة ابن حفيظ واللـي رافقـوه=مروي شباة السيف حلال الصعـاب
((تاريخهـم بالسيـف والـدم اكتبـوه=يوما سجل المجد في حبر وكتـاب))
والطير خطـلان اليمانـي ظيفـوه=ياكل ومايبقى يحطـه لـه زهـاب
والضبعة العرجـا عشاهـا كثـروه=وشبعت به العرجا مع شهب الذياب
يوم العراص وراية العـز حملـوه=والسيح من دونه يثنـون الركـاب
قوما نصرها الله ومن ظلم انصروه=ونفوسهم ماهيب تقبـل الاغتصـاب
حطوا اقسـوم وقيدهـم ماقسمـوه=واسقوهم السم المصفـى والعـذاب
كلـه لعيـن اللـي ولدهـا هملـوه=مستعجلا من خوف يلحقه الطـلاب
ولا عنا طرشا من المظمى خـذوه=تباشري بالمنـع ياجـرد الرقـاب
وصـلاة ربـي عدماخلقـه دعـوه=راعي الشفاعه لامته يوم الحسـاب

وقصد بن حفيظ في بن خرصان لانهم مكرمينه وقال ذا الابيات يوم خان في الدواسر ولا منع الدامر ولا قاله تراهم اخواني وقصراي مير علمه عن مكان ابل المساعره ولا عندها
احد
يقول محمد بن حفيظ في بن خرصان:

الشامري عقب الكرامة تعرّا = كني بما يجري على العير داري
دمحت أنا له زلتين ٍ تمرّا = والثالثة قد هو بغوجه يماري
طعنتهم طعن ٍ كله لعينك يسراّ= كله لعينا لابسات الخزاري
ولا لعينا بكرتين ٍ تجرّا = حنينها غب الصلف والمساري

وهي طويله
ورجعو الشكره ابل المساعره
والسموحه يا الربع وان جا شي من القصيد بعد ابشرو لكن اللي يعرف الله لا يهينه
يعطينياها
والله يرحم ماتان العجمان والدواسر ويعفا عنهم
ويرحم ماتان المسلمين

والف شكر الي الاخ بلنتي الشكره علي اكمال قصيدة دخيل ابن محمد ابن دخيل الله الشكرة .