لا تبدي اسرارك ترى السر أمانه
 

لاتبدي اسرارك ترى السر امانه
ماكل من تغلي على السر مامون

احيان من باب الثقه والميانه
يظرك الغالين من دون يدرون

السر خله وسط جوفك مكانه
سر الحكيم بداخل الصدر مدفون

والرجل قد قالو لسانه حصانه
خل الرسن بالراس يمشي على الهون

واهجر حصانك لايزيد هذبانه
اعرف ترى المجلس له آذان وعيون

واترك هزيل الهرج واختر سمانه
لايستفزك للغضب شك وظنون

ولاترافق كون رجلٍ تكانه
منه رجال المعرفه يستفيدون

ابلج على ربعه وسيعٍ بطانه
مهوب ملي لسقايط يصيدون

ماينقل علومٍ عليها غشانه
الا الوكد ماهوب قولت يقولون

وإلى عرفت اللي يبي لك لهانه
خلك بعيدٍ عنه وبليس ملعون

عليك في كل الظروف سفهانه
عده معا نزالةٍ مايشدون

وخلك نبيه وخل عندك فطانه
ولاتصير بكلمة السو مديون

والجاهل اللي مايساير زمانه
يبقى رهينة حلم والناس يبنون

وإلى رضيت بمنزلٍ في طمانه
فأعرف ترى غيرك لها مايدانون

وانكان كادك منزلٍ بالبيانه
انزل مع اللي من الوطا مايظيقون

قال الزلامي صحح الله لسانه
دور وتلقى واحدٍ منك وادون

عبدالله بن فهد بن هذال الصخابره