::: مـنتدى قبيلـة الـدواسـر الـرسمي ::: - اليـا هـداك الله لخـوه وخاويـت

منقول ولا اعلم هل تم عرضها سابقا ام لا ولكن في حالة عدم ذكرها من قبل ارجو تثبيتها

قصيدة عبد المحسن المطوع من بني زيد يقول فيها

بعض المجالس لاهجرتّـه تهنيـت

لاصار يجمع له وجيه(ن) قبيحـه

اما حكو في غرتك كل مـا أقفيـت
ولا بلـوك ولفقـولـك فضيـحـه

والمجلس الي مجمع(ن) للسرابيـت
يثر علـى نفسـك وسـدك يبيحـه

ومن لامني لاشمت عنّه وصديـت
يطيح ما سمّـا ويشهـق بصيحـه

في صفرت(ن) فيها ثمانين عفريت
تكسـر رقبتـه مايغـادر مطيحـه

اليا ومرك الله وفي السوق طبيـت
جنب عـن المترديـه والنطيحـه

واليا هـداك الله لخـوّه وخاويـت
دوك الدواسـر كاسبيـن المديحـه

قوم(ن) لياجات الحرايب طواغيت
وكفوفهم تنـدا ولا هـي شحيحـه

فقيرهـم لاجيـت بيتـه تعشيـت
تلقى الشحم والعود الازرق وريحه

وكريمهم ترحيبته بـك ليـا جيـت
ترحيبتن تبري القلـوب الجريحـه

ان قلت له تبقى قلط بك على البيت
وان قلت وشلونك ذبح لـك ذبيحـه

وصبيهم لاصحت فيـه وتعزويـت
صدره من النخوه يـروّع فحيحـه

قبيلة(ن) يفخربها الحـي والميـت
شريحة(ن) راحت وباقي شريحـه

من عاش يبقى طيب الذكر والصيت
ومن راح منهم جعل ربـي يبيحـه

الاد زايـد هيّضونـي وغنـيـت
ومن طيبهم هاضت علي القريحـه

حاولت اعد فعولهم لاكن ازريـت
ولا قلت فيهم غير حاجه صحيحـه

فهمت من بعض التجارب وعانيت
ويكفيك عن بعض التجارب نصيحه

اليـا هـداك الله لخـوه وخاويـت
دوك الدواسـر كاسبيـن المديحـه

وهذا رد الشاعر سلطان بن محمد آل مطلقه على شاعر بني زيد الشاعر عبدالمحسن المطوع

لانسنس الغربي وقفـت وتساويـت
ولقّيت صدري للهبـوب المريحـه

نسمة هواه تشتت الضيـق تشتيـت
وتّلنـي يـم الفجـوج الفسيـحـه

لامن سريت أسري على ماتهقويـت
واسبر لبراق (ن) يشّـوق لميحـه

هجس(ن) يلوح ويلتطم دون توقيت
ويشب في صدري سوات القديحـه

من دون ليه ودون يمكـن وياليـت
لو بكتمه نفسـي ماهـي مستريحـه

فرايـد المعنـى لهـا ماتوانـيـت
ومن شانها مكنون صـدري ببيحـه

اوحيت قيفـان المطّـوع وفزيـت
لانها حوت كل الوصـوف المليحـه

البيت منها في عيونـي ميـة بيـت
تسلب عقول اهل العقول الرجيحـه

شبّهتها روض(ن) زهوره منابيـت
غير الخزامـى قحويانـه وشيحـه

حييّت ياشاعر بنـي زيـد حييّـت
يفدونـك اللـي يجلبـون الكسيحـه

مدحتنا يازاهـي العـرف واثنيـت
من صادق شعور ونوايا(ن) صريحه

من طيب راسك في قصيدك تعليـت
طيب(ن) ورثتـه ماخذيتـه منيحـه

وش الغريب ليا سِميـت وتساميـت
دامك سليل اهـل الوجيـه الفليحـه

قوم(ن) لكم في قمة المجـد تثبيـت
مثل الجبـال الراسيـات الرزيحـه

مجد(ن) عليه من الجزاله ثوابيـت
هـوج الريـاح العاتيـه ماتزيحـه

انتو كما العد الرهاوي علـى هيـت
غزيـر جـم ومايكّمـل نضيـحـه

في السلم سلم وفي القساوه نعاتيـت
ويح الذي يجهل بنـي زيـد ويحـه

عز الله انـي لوكتبـت وتحاكيـت
بشعر النبط ولا بشعـر الفصيحـه

بتشيب قيفاني من العـد ماحصيـت
افعالكـم يامجملـيـن الصفيـحـه

لاكن سبب قافك حميـت وتحاميـت
وصارت على ماقيل فرصه سنيحـه

عن لابتي ياطيب السـاس رديـت
وانا على المـردود نفسـي لحيحـه

دامك عريب وفي قصيـدك تعليـت
يفدونـك اللـي يجلبـون الكسيحـه