يا ذعار لا جيتهم يوم انت مرسالي= ما خاب من كان مثلي وانت مرساله
سلم عليهم سلام صافي حالي =واثنه على اللي يقول العود وش حاله
هذا وانا يا فتى ما هوب عزالي=كم واحد يمتني مثلي ولا جاله
انا الحمدلله عزيز وطيب فالي=ومن كان مثلي عزيز وطيب فاله
ياناس خلوني المسؤول بهبالي=واللي بصير بحاله مالي وماله
لولا المهبل حشا ما يرتشي حالي=جعله اهبال يزود وزوده اشلاله
خلوني ادله مع الخبلان واشلالي=ما سرني صاحي في دبرة احواله
يا عيال هاكم جواب من تمثالي=كلام عود قضا باللي تهياله
تكفون حاذور من سيرات الانذالي=ترى الفتى سيرته من جوهر افعاله
لاتحسبون الفخر في جمع الاموالي=كم واحد عوقه المسموم من ماله
يا مليم المال جعله قله الوالي=لا صار ما هوب في العازات يشفاله
اما صديق شفيق حده الالي=والا بن عم ثقل حمله ولا شاله
الجوهر الغالي اللي مكسبه غالي=كسب الثنا يوم ما كل بيحتاله
والطيبه سنها الاول على التالي=ومن جنب الطيب واهل الطيب عزاله
والغانمه ما كسبها كل رجالي=ايضا ولا كل رجال بيتهياله
والما المسمى يبي دلو ومحالي=وكل يقوس الطويل ويرد بحباله
هذا جوابي وانا اقوله ولا ابالي=من مصنع صايغه يفهم تسلساله
مانيب كوح يرقعها بالاسمالي=ما حل في خاطره من ملهج قاله
اصبها صب وانخلها بمنخالي=واصفها صفة الصراف لرياله
هذا ولا نيب للعربان دلالي =مني وعني واقوله واتثناله
افضيت عما مضا باللي تهيالي=واستغفر الله بدق القول واجلاله

المشاركة الأصلية كتبت بواسطة يحيى الودعاني تسلم يمينك ، ولاعدمناك يالذيب . والله يرحم الشاعر \ سعد بن هتيل المسعري الدوسري

المشاركة الأصلية كتبت بواسطة فالح الشكره (المشاركة 133411) تسلم يمينك وبيض الله وجهك على ايراد هذه القصيده الجزله وصح لسان الشاعر ولسانك. والله يرحم الشاعر \ سعد بن هتيل المسعري الدوسري

المشاركة الأصلية كتبت بواسطة ابو زيد الغييثي (المشاركة 133494) صح اللسان الشاعر سعد بن هتيل وبيض الله وجهك يابو سالم اخو ك ابو زيد....

المشاركة الأصلية كتبت بواسطة أبو فهد المسعري (المشاركة 133507) صــــــــــــــــــــــــــــــــــــــح لسانك