البارحة راقد ونومي تعوماس = كثر الطواري تحط الراس شايب
أشوف وقت على الاجواد محتاس = عقب المودة غدو قوم وشعايب
والله لولا حكايا كل بلاس = لاصيح في اللي يفكون النشايب
أميرنا بادي شيخ على ساس = في رايته ما نطاوع كل خايب
لاجا المسير جعل للبن محماس = ومتعب مجلسه غمر وشايب
كم سربة قد شعاها فوق الافراس = عند الحنازيب لا جات المصايب
ما هوب يسعى لربعه لتبلاس = ولا بيفرح بسرماد الطلايب
عادات ربعي على الأنضى التنوماس = نواسة الحف من فوق النجايب
يا زين شب المنارة عقب الأعماس = في مجلس فيه عطبين الضرايب
في ربعة نورها نجر ومحماس = ومشاهد اللي سوالفهم عجايب
راحت اسلوم العرب حلم ودراس = ما عاد بلا معاميل الحبايب
يا الله أنا طالبك لا قرب أبو ياس = اغفر ذنوبي و أنا للرب تايب
لا ولموا حفرة مترين بقياس = هم حدروني تحت عوج النصايب