سلام الله سلام الله على اللي يلعب الطاروق=تحيه للرجال اللي على القلطات خابرها
الا يالرمح هات العلم لو العلم بالصندوق=ولن شفت المهبل والمجنن لاتشاورها

هلا يامرحبا ياصاحبي بالفعل والمنطوق = بيوتٍ شاعر القلطه على الصفحه يحررها
يجيك العلم والمعنى عن الي مايعرفه فوق = لاكن ياصاحبي سوق الركايب لاتحيرها

الا من يدخل المضمار ياسابق ويامسبوق=ولاتصبح كما اللي في حفايرها جفايرها
ركايبنا على المعنى نهد جهودها بالسوق=تصبحكم تمسيكم بعد ساعه تناظرها

الامنك خذيت المنعطف يا بورجب برفوق = على شان القرنبع ماتعلاها توايرها
دفعني للمعاني ياصحيب الخير دافع شوق = نسولف للرجال ونعرف الي في ظمايرها

ترى ماعذّب العشاق كود الشوق للمعشوق=ومن ذاق الفراق العين هلت من عبايرها
الا من طب وسط اللعب يافالق ويامفلوق=وليا منّا كسرنا العظم ماتجبر جبايرها

مدامك ياعميل الخير تعرف سلة المفتوق = نصيحه لاتقربها توهق في خسايرها
عطاك الله اذانٍ صاغيه واعطاك جوز ارموق = الى منك سلمت بمره احذر لاتكررها

الا ياشاعر الحله الا يالشاعر المرموق=عليك الدايرات تدور وانته في دوايرها
نبيع ونشتري وانسوم لامن جيت وسط السوق=ومسلم في ديار المسلمين اعرف شعايرها

تراك بكلمتك ياصاحبي يابورجب محقوق = لكن اسحب كلامك لاتزعلني وافجرها
الى جيت الربيع اقطف من النوار والزملوق = تغانم فرصتك دام الله الخلاق ساترها