يالله عسى القانس قنوفه مزابير=ينهل وبله ويتجدد ربيعه
يزف فيها النبت ويغرد الطير=طبيعة(ن) يازينها من طبيعه
تلقى الخزاما والنفل والنواوير=متخالطات(ن) في فياض ونقيعه
حيثه مرب(ن) للرجال المناعير=اللي كما وصف الحصون المنيعه
يرعون فيها السود جل(ن) واباكير=ماهمب فيها يرتضون الهزيعه
مكاسب(ن) ماهيب مشرى دنانير=يوم أن ولد اللاش ضيع صنيعه
هذي مكاسبهم على الشر والخير=وهذي قلايعهم قليعه قليعه
في جنبها اللي يحتمون المعاشير=اللي حموها بالسيوف الوريعه
من مارثة ودعان ريف الخطاطير=قوم(ن) منازلهم براس الطليعه
وأفعالهم يشهد بها قول الامير=في حرب نجران(ن) وحرب الوديعه
ذا قول من فكر ودار التفاكير=وتساوقت مثل التبيع وتبيعه
جتني رسالة شاعر(ن) حزة عصير=يامرحبا باللي علومه سنيعه
يامرحبا عد القنوف المحادير=بروقها فالنو يلمع لميعه
بك ياعشير المرجله والمخاسير=يلي كسبت الطيب طبع وطبيعه
مثايلك فيها وقار(ن) وتقدير=لانك من رجال(ن) تذب الرفيعه
هل ست ماهابوا جموع وطوابير=وعدوهم ضاقت عليه الوسيعه
وهل ديرة(ن) فيها الكرم والتباشير=ونخيلها محصولها ماتبيعه
يابو حمد لاهنت في حسن تعبير=متميز(ن) دايم بيوتك شنيعه