بسم الله الرحمن خير البدايات = إلهنا رب السما والبريات
سبحان من خيره على الخلق ظافي = الرازق الباسط بديع السماوات
الظاهر الباطن والاول على الكل = حق لنا نعبده ونكفر اللات
شرد المعاني تجتول داخل الراس = ولولى الرجا بالله ماسقت الابيات
يالله ياربي رفعنا يدينا = وحنا تحملنا ذنوب وخطيات
اغفر خطايانا وثبت خطانا = على طريق الخير في كل وجهات
ونسألك غيث مدلهم خياله = لانشى ربابه والتحم جاله اصوات
حن الرعد والبرق في مقدمه لاح = ينساق صوب ديار نجد العذيات
ويهل وبله في الفياض العجيبه = يحيي نبات طالت ايامه سبات
كله من ذنوب علينا كثيره = حتى اللمم صارت علينا بسيطات
يارب لاتواخذ عصاتك علينا = وارحم عباد تقضي الليل طاعات
اليوم في وقت علينا تغير = ياكثر ماشفنا من الوقت غارات
ياسامعين القول عندي بضاعة = بلاش ما يلحق عليها خسارات
من اولا تشرى وذا الحين تهدى = عشاقها قلت وفيها المسرات
اسمع ياغافل لايغرك نشاطك = وقتك ثمين ودور الايام عجلات
استثمر اوقاتك على مايسرك = اما مع اهل الخير رفقه وجلسات
والا بترك الشر حث الجهودي = اياك واهل السو لهو وغفلات
شبابنا له هيبه وعز وصيت = بكم الامم تفخر بكل المجالات
ياما عليكم تعتمد نصرة الدين = شباب الامة ياشباب المروات
في ما مضى عمود للدين وانصار = واليوم في غفلة وترك الصلوات
كم عمر ابوطالب علي يوم فدى = دون الرسول وحاز لاعلى الدرجات
هذا الشباب اللي عليه الكلامي = الله واكبر ما اكبر الفرق للذات
ذيك الهمم ياطالبين المعزه = اللي تسوق اصحابها للطويلات
في طاعة الله كل همه تعلا = وسنة نبيه من مسكها له اثبات
وترك النواهي واتباع الاوامر = هي مخرجك لاجالك ازمة وضيقات
والامر بالمعروف يلزم علينا = تراه من افضل جميع العبادات
ومن بعد طاعة والي الكون كله = لايفلت برك ترى الحبل فلات
الوالدين حقوقهم واجباتي = حيين والا بعد من حسبة اموات
جنتك تحت اقدام الام الحبيبه = والله ماتلحق جزا الام بالذات
تسعة شهور تنقلك في حشاها = تصبر على ضيم الليال العسيرات
وعامين حطت عضدها لك مخدة = ومع ذا وذاك عيونها لك لبيبات
وابوك عضدك كل ما احتجت في شي = اياك لاتنسى حقوقه عظيمات
وبنخا شباب اليوم ياصفوة الجيل = بقول شي شفت ما عقبه سكات
لا ياشباب هلك في رغبة النفس = لاتطيع نفسك رغبة النفس شهوات
تكسب امراض وتكسب ذنوب وهموم = ويروح عمرك بين حسرات واهات
لافات شي مارجع لك على الكيف = تعاني همومه سنين طويلات
النفس مثل الخيل صعبة ومطواع = ان ماعسفت النفس راحت بك وجات
ما تقول يانفسي عن الشر شومي = وامشي مع اهل الطيب طبع وعادات
رفقة رجال الطيب هي مكسبالك = والمرجلة ماتنجلب بالسهالات
جالس جليس العز واياك والسؤ = اللي حياته بين نمه وعثرات
حطه رسول الله كما نافخ الكير = ترى جليسك في نظر غيرك مرات
وياللي نقل حتفه على كتفه وسار = بسّمٍ يفرح كل عاذل وشمات
لا للمخدر ياعيال الحمايل = غزوا غزانا حط خلق الله اشتات
يسحب خلايا المخ حتى النهاية = كم نسمع وكم ينشر من الدعايات
وعيوننا تنظر والاحساس ميت = ما نتعظ قبل الامور الملمات
يجيك راعيها كما سالم الزير = ما احدٍ فعل فعله وهي بس ساعات
يبني ويهدم ما تعدى مكانه = في كل موضوع وضع فيه بصمات
لاتروح منه انظر بعدها بساعة = وان ما استفدت اليوم تلقى المهونات
قلته لكسب العبره ونستفيدي = والله ما قلته مرائي وشمات
وين انت ياعود يبري ضميره = قدام لاتجرع من الوقت لوعات
ابناك في رقبتك مهمة صعيبة = وانت الذي حملت كل الامانات
العود لامن يبس يصعب عداله = تغانم اعيالك قبل ياتي اوقات
تلقى المهونة من قريبين وبعيد = وكل نظر لك نظرة الذيب للشات
ياناس دنياكم جمارك مروري = والله لو ناقف مع الذات لحظات
معاد تسوى في نظرنا ولاشي = يوم فرح وايام ناكل مطبات
غدارة خوانة مالها اصحاب = تضحك وهي تخفي من الوقت نكبات
بالله لحظه وين سيد الخلايق = صفوة جميع الناس هو مابعد مات
لاوالله الا مات وانا على الدرب = نمشي ولامعنا عليها ضمانات
فيالله تحسن خاتمة من يخافك = لعمال تختم دايما بالنهايات
واغفر خطايانا وثبت خطانا = على طريق الخير في كل وجهات
وختامها مني صلاة وسلامى = على رسول ماكتب له خطيات

المشاركة الأصلية كتبت بواسطة ابو اثير (المشاركة 601595) صح السانك شافي النتيفات وقصيدة تنومس وفيها من العظة والعبرة الشيء الكثير نصيحة جميلة رحم الله والدينا ووالديك والمسلمين اجمعين تقبل مروري وتحياتي

المشاركة الأصلية كتبت بواسطة ابو حسين الدوسري (المشاركة 601607) بيض الله وجهك اخوي شافي الجزل مايجي منها اللا جزاله شاعر وتغرف من بحر قصيده فيه من الموعضه والنصح الشي الكثير كل التقدير

المشاركة الأصلية كتبت بواسطة ناصر الفصام (المشاركة 601626) الله الله يا ابوشالح قصيده طيبه وبيض الله وجهكُ ..~ وهذآ من طيبك وطيب اصلك يا القرمً .. والله يجزآك خيرآ وبـارك الله فيك وتقبل تحياتي

المشاركة الأصلية كتبت بواسطة محمد بن حمد الشكرة (المشاركة 601849) صح السانك شافي النتيفات وقصيدة تنومس وفيها من العظة والعبرة الشيء الكثير تقديري,,,,

المشاركة الأصلية كتبت بواسطة خميس الغييثي (المشاركة 601850) الله الله صح لسانك واعتلى شانك ابيات رائعه ونصيحه اروع والله اني قرأتها اكثر من مرة من روعتها ابوشالح شهادتي فيك مجروحه وانت تعرف رأي فيك ولكن انا قلت لك (انت شاعر الدواسر الحماسي) الاول تقبل اعجابي وتقدير واحترامي