ياراكبٍ من فوق سابقْة الأصوات=مسارها بين السما والسحابه
مطار هيثرو لفّته خمس لفات=ثم تلّها الكبتن بعزم وصلابه
علمانيٍ مايعترف بالديانات=ماهمّه ألا نوع غرشة شرابه
يالله عسى دربه سفير وسلامات=الين يوصل خطّي اللي سعابه
وإن مادخل الإسلام وأدّى الصلوات=قدام لايكمل مسيرة ذهابه
فيالله عسى فاله خشوم السروات=وألا انفجارٍ في الكبينه غدابه
ياخلف بن ناصر سلام وتحيات=اعداد من يقرا حياة الصحابه
واعداد من صلى النوافل والأوقات=في ساحة البيت العتيق ورحابه
الليل طال ونازح الدار مابات=يدوي به الهاجس وهمّه سرابه
ينوح ابن تركي على فايتٍ فات=راحت حياته ماتهنى بشبابه
وجدي على نجد العذية وبالذات=من عاش في نجدٍ وسارت اركابه
وجد اليتيم اللي عيونه غريقات=أبوه لحق أمّه ولاله قرابه
في ديرةٍ ماحولي ألا الخواجات=حمر الخشوم مدلعين الكلابه
ماجيتهم حب وسياحه ورحلات=جيت وعلى متني طويق وهضابه
أما غناة الذيب عقب المعاناة=وألا الفقر في كل ضلعٍ رقابه
ولالي ورا الدنيا مرامٍ وغايات=وأشوفها أحقر من جناح الذبابه
لكنّ رمحٍ في الحشا له مسافات=أبحث عن علاجٍ يخفف صوابه
وأنا رجاي بعطف رب السماوات=الواحد اللي مايخيب الرجابه
لولاه ماشلنا الحمول الثقيلات=ولاتحملنا القلق والكآبه
هذا هو الموجز وبعض الإشارات=يالوافي اللي في القسا يعتزابه
ما أرسلتها لك في رجا رد الأبيات=لوّك من أرباب الشعر والخطابه
أبيك تفزع لي بكثر الدعوات=لعلّ منها دعوةٍ مستجابه
واسلم وسلّم لي على أهل البطولات=أهل الحمر.. واللي عزيزٍ جنابه

المشاركة الأصلية كتبت بواسطة فراج بن فهد (المشاركة 348338) توضيح ولي عودة لتعليقات اخواني الكرام : لكنّ رمحٍ في الحشا لـه مسافـات أبحث عن علاجٍ يخفـف صوابـه هذا البيت مجرد تشبيه أو تعبير مجازي لمعنى أقصده لاعلاقة له بالمرض الحقيقي ولله الحمد وإن كانا يحملان القسوة نفسها . وكل الشكر لمشاعركم الطيبة ولي عودة إن شاء الله