يا صاحبي كان تبغى الطيب وأمجاده = عندك تواريخ ربعي ترثة أجدادي
تلقى نجوم المعزّه دوم وقّاده =(دواسر ٍ) طيبهم في النّاس يزدادي
في الابل خذينا السنام وفوقه اشداده= وفي القاع روّح من العارض الى الوادي
ان كان للطيب ساده ..ربعي اسياده =صبيّنا لاطلع ماهوب ينقادي
رباني اللي غلاهم داخل فؤاده = من كثر ماهو عشقهم صاروا فؤادي
سلّم عليهم عدد برقّه ورعّاده = سلام ٍ اطيب من الهتّان والكّادي
بلّغ سلامي لهم والكل في بلاده = من شاعر ٍ لاكتب ماهوب قصّادي
من دون ربعي قصيدي ماله ازياده = لو اجمع ابداع شعري دونهم ..عادي
فأنـّا هل العز والشيخه لنا عاده = آلاد زايد هل الطالات من بادي
دخلينا لازبن يكبّر وساده = حنا زبون الجلاوي درع واسنادي
على الجزيرة لنا اسم ثبّت اوتاده =أفعال ربعي عمى من كان حسّادي
من سد مآرب تركنا الملك ياساده!! = ملوك في كل أرض وجوّنا هادي
كل ٍ على دارنا ايده على ازناده = من فضل ربي رخا والناس في اطرادي
من قبل مبعوث رب الكون لعباده = تاريخ ثابت قبل تاريخ بغدادي
في الناس حسّاده وفي النّاس نقاده = انا دخيل الولي من ظلم الأجوادي
غيري يصدّر ولا يدري بميراده = من قبل اصدّر اعرف شلون ميرادي
لاشفت وضحا ً عليها (هلال وقلاده) = وسم الغياثات لامن جاك نشّادي
ياعزوتي ياجروح الموت واضماده = ما خبر منّا ذليل ولا خبر غادي
ردوا سلامي على (ابن قويد) وأحفاده = اني لهم شاعر ٍ في كل ميعادي
قصيدة ٍ في (الدواسر) جات منقاده = كتبتها في الكويت ورّحب الوادي