بديت بأسم الواحد الفرد الصمد= علام مافي برها وبحورها
اللي رفع سبعآ بلاجسر وعمد= والارض نبت سهلها ووعورها
من بعدها صغنا المثايل ياسعد= للابة اللي حاميين سورها
لآد الزميمي زبن من ضامه ضهد= مثل البروق الساطعه في نورها
خوالي اللي في اللقا توفي الوعد= في عصرنا ولا في قديم عصورها
ربع(ن) على الصاحب كما نبع الشهد= ولا العدو تسقيه مر مرورها
في ضفهم من لاذ يبشر بالسعد= تآرد على الهيجا فدى ماجورها
عدوها يسهر وجفنه مارقد= يرقب جيوش(ن)مانكسر طابورها
يشهد لها التاريخ والماضي شهد = قبل الركايب هجنها ومهورها
تآرد وحاديها عن المى ماورد= بمصقلات(ن) مروويين شفورها
وهذا وأنا من لابة(ن)ترث نكد= لاأقبل علينا من يدن نجورها
لاأقبل علينا بالعتاد وبالعدد=يبغي الكسايب دونها مصطورها
من دونها رجال(ن)تحلى بالجلد= يوم الوغى تركب أصيل مهورها
آلآد شكر(ن) سعد من هم له سند= كل القبايل عارفين(ن) دورها
حنا هل الست اللذي قطاب العدد= نفتكها من عاديات أمورها
حنا كما بحرآ ألاهاج ورجد= مايروي الضامي براد نهورها
حنا كما بحرآ ألامنه ركد= نروي ضما اللي لايذآ من جورها
من شافنا بالحلم يبطي مارقد= ومن شافنا بالعلم علة زورها
كمآ عقيدآ من سببنا باللحد= ويذكر فعايلنا بوسط قبورها
وقصيرنا يآمن ولاأحدآ له نشد= بين الرعايا متيهآ بقفورها
وماهزنا في عمرنا برق ورعد= ولاهزنا جمعآ يقود جرورها
ذا فعلنا وكلن على فعله قصد= وكل القبايل وافيات اشبورها
الرجل لآمنه على العليا صعد= ضلعآ عسيرآ عاليات وقورها
يقدم على زرعه ويجني ماحصد =من فعله الطيب جنى لثمورها
وألا الردي لاطاح في دربه قعد= ماهمنا دامه يروم ثبورها
هذا كلام الشاعر منذر بن حمد= قريحته جادت حسب مقدورها

ماكل من قال القصيده قد قصد = لابو قصيده ماتوفي شعورها
ما عوى السرحان من عيشة رغد = والصقور مبرقعه فوكورها
يا ابو حمد يا ابو حمد يا ابو حمد = قصديتك هاذي أنا جمهورها
واللذي نزل تبارك والبلد = الجزاله ماكنه فسطورها
ونعم بالآد الزميمي يا ولد = ربعٍ مع العليا طوال اشبورها
يستاهلون المدح جاليين النكد = معشية سبع الخلا ونسورها
رفيقهم عزه على القمه صعد = ما اشتكى عوج الليالي وجورها
وعدوهم بيديه يحفر له لحد = علته ما ينفعه دكتورها
حنا لهم لاكبرت الدعوه سند = لا غلقت بيبانها مع سورها
كبيرنا الضرغام حلاّل العقد = وصغيرنا ماهو بيجيب قصورها
من شكره وامجادنا توفي العهد = كم عظامٍ قد عطبنا كسورها
عدونا لو شافنا جاله رمد = بعيونه اللي قد قصرنا نورها
ورفيقنا يبشر بعزه والسعد = لو كان عزه في عميق بحورها
ناسم عصا الجار ونرده من كبد = هاذي عوايدنا قدام عصورها
وداية الجيره سلاحه لو ظهد = نسوقها منّا ندور بورها
بالمهار الصفر وافية العدد = قد خذينا المجد فوق ظهورها
لا ثوّر البارود والباطل قعد = بندقي مانيب ادوّر شورها
منّا نخلط السم مع صافي الشهد = سواة قومٍ تفتخر في ثورها
دواسرٍ كواسرٍ مثل الرعد = لا عرضت بعض العرب بمهورها
في كبد صاحبنا كم ثلج البرد = ونرد ما كاد العدا بنحورها
وهذا على ما قيل تجديد العهد = وكل القبايل وافيات اشبورها
وهذا وعد من شاعر ( مهنا ) وعد = الرجال الوافيه لا ازورها
وصح الله لسانك يا ( منذر بن حمد ) = والكايده تنخاك يا مامورها
وسجل اعجابي دخيلك للأبد = قصيدتك هاذي أنا جمهورها
وصلوا على خاتم نبيينه عدد = كل البساتين الخضر وزهورها

حمد الودعاني

لاهنت على نقل

المجاراه وبيض الله وجهك


والف شكر لابن رشود وبن مهنا

وعساهم على القوه

المشاركة الأصلية كتبت بواسطة عبدالله الشكري لاهنت يالودعاني وبيض الله وجهك على المساجله الرائعه وهذي عوايدك يالقرم اخوك عبدالله الشكري

المشاركة الأصلية كتبت بواسطة ماجد المهنا السلام عليكم ورحمة الله وبركاته .. حمد الودعاني .. الله يعطيك العافيه .. انت والربع اللي ردوا جميع .. وصحت ابدانكم .. ومشكور على هالمبادره الطيبه .. الله لا يهينك على كل حال .. ولا خلا ولا عدم .. ماجد المهنا